E matuā sa’o lava le faaupuga a le atunuu e faapea, E toeaina lava le pusi ma si ana felau… O le faasa’oina o lea fuaitau, na iloa lea i le taaloga a le aulakapi a le aumatutua mai Samoa, ma le aulakapi a le aumatutua a le Aukilani Samoa.
O le ‘au lenei mai Samoa, na to’ai taunuu i le Aso Faraile i Aukilani nei, e malaga mai mo ni latou taaloga i Aukilani nei, auā le tapenaga mo le taamilosaga a le Ipu o le Lalolagi a le aumatutua e faia i Iapani.
Peitai o loo mafai ona faamatalaina mai e lenei aulakapi, le tulaga faaauauina pea o le taaloga, e lē mafaitaulia pe fia tausaga o le soifua, ae o le itu tāua, ia faaauauina pea lenei taaloga.
E ui ina e ese mai foi aga ma tulafono o le lakapi a le aumatutua mai le lakapi e masani ai, a o le itu tāua o le mafai ona taaalo.
O le Aso Toonai la na tea nei, na amata ai nei taaloga i le ipu ua saunia e le Susuga i le faafeagaiga a le Ekalesia EFKS, susuga ia Ata Milo, lea ua faaigoa ai lenei ipu i le va o Samoa ma Aukilani o le Ata Milo’s Cup. O se mea e lē masani i le vaai, o se tamā matua 70 tausaga le matua, ma o se tamalii foi sa iloga i le lakapi i tausaga ua tea, ae na toe vaaia i luga o le malae, le afioga ia Sapa’u Lole, aemaise o nisi o tama tuai sa atina’eina mai le lakapi, i totonu o le atunuu, e lē gata i Samoa, ae faapea foi Niu Sila.
Na saunoa le Peresitene o le Iuni Lakapi a Aukilani Samoa, le afioga ia Aiolupotea John Roache e faapea, e tāua tele le malaga mai o lenei ‘au, e fai ma liutau i o tatou foi tagata o loo i Niu Sila nei e toe mafai ai ona toe lalaga le taaloga, ona ua faatuutuu lava i ai ona o le tele o feau ma tiute i lenei atunuu.
Sa saunoa foi Aiolupo ma ia ta’ua ai e faapea, o se a’oa’oga tele lenei ua aumai e lenei ‘au, aua e tele vaega tāua e mafai ona maua i nei taaloga, e lē gata e maua ai le soifua maloloina, ae o le toe faamasani i le taaalo faatasi o nisi o nei tamalii sa latou tauasa mai le faigata o le lakapi i totonu o le atunuu.
Ua faamoemoe e tolu taaloga a nei ‘au, ma iloa ai poo ai e mau ai le ipu o lea ua amataina ai lenei taamilosaga i lenei tausaga.
