O le masina o Me ua tea na faailoa ai e le Malo a le National suiga ua iai latou faiga faavae mo aiga e fia malaga mai Atunuu mai fafo mo Niu Sila.
O le autu o nei suiga ua faafaigofie ai ona maua le nofomau a le tagata e lelei faailoga mai se aoga maualuga poo se iunivesite. O le isi ua faafaigofie ai ona maua le nofomau a le tagata e tele ana tupe e sau ma ia i Niu Sila.
O i latou nei oloo ave i ai le faamuamua a le Malo, aua o latou nei e mafai ona ola lava latou i le latou malosi e aunoa ma le manaomia o se fesoasoani mai le Malo i mea tau galuega, penefiti, fale, poo le tausigia o le soifua maloloina.
Afai e saili ma suesue atu oe e leai sou agavaa e vave maua ai sau galuega lelei, ma e leai se teugatupe tele oloo ia te oe e tausi ai oe ma lou aiga mo se vaitaimi umi – e te lē agavaa e sau i Niu Sila.
Ma afai foi e leai se vaegatupe e vave faatau ai sa outou fale, poo se vaegatupe e tausi ai oe pe a e manaomia se fomai poo le auaunaga a le falemai – o lona uiga e te le agavaa i lalo o faiga faavae fou a le Malo e maua ai se nofomau i Niu Sila.
O le suiga muamua lea ua iai i faiga faavae mo latou oloo fia malaga mai i Niu Sila e nofomau – ua ave le faamuamua ia i latou e tele so latou agavaa poo ni faailoga e faigofie ai ona maua se galuega i Niu Sila.
E le gata i lea ua ave foi le faamuamua ia i latou e fia malaga mai e nofomau i Niu Sila ae e tele se teugatupe o loo sau ma ia i Niu Sila.
O le isi itu tāua o nei suiga pe afai lea oloo fia aumai ou mātua i Niu Sila. O le suiga ua iai nei – oloo faigofie ona aumai ou mātua pe afai o lea e mafai lava e oe ona e faatupeina le tausiga o ou mātua e aunoa ma le manaomia o se fesoasoani mai le Malo.
O lona uiga e tatau lava ona faaali se tino i tupe tele oloo e teuga mo le faamoemoe o le tausiga o ou lava mātua i ni tausaga se tele i le lumanai. Afai e foliga mai e te le mafaia ona tausi lava e oe ou mātua ona faafaigata lea ona maua se nofomau a ou mātua i Niu Sila.
Afai foi e sailiili atu e le agavaa ma e vaivai le talanoa a ou mātua i le gagana faaperetania, e tatau ona iai se tino i tupe e faaaogā mo le totogiina o se aoga e aooga ai ou mātua mo le aoaoina o le gagana faaperetania. Afai e leai se vaega tupe mo le totogiina o lea aoga, ua le agavaa ona aumai ou matua i Niu Sila.
Fai mai le Malo o le mafuaaga o nei suiga ona ua latou faia ni suesuega i mātua oloo aumai e a latou fanau i Niu Sila ma o le 87 pasene o nei mātua e sili atu ma le 18 masina o lo’o nofomau i Niu Sila ae e le faigaluega.
E le gata i lea o nei matua ua aumai e latou fanau ma ua taunuu mai i Niu Sila ua latou tapa fesoasoani a le Malo e pei o penefiti ma fale, ma ua maua fesoasoani i talagavai ma le fesoasoani mo le soifua maloloina, ae o lea faatoa taunuu mai i Niu Sila.
Ua maitau e le Malo o le toatele ua latou maua faamanuiaga mai le Malo a Niu Sila, ae e leai se latou sao ua faia mo le atinaeina o Niu Sila.
Ua faapea mai le Malo o le va o le 3,500 agai i le 4,000 mātua e maua o latou nofomau i Niu Sila i tausaga taitasi. O le aumai foi lea o ou uso poo tuafāfine, poo se fanau ua matutua ua le o toe taliaina e le Malo ona o mafuaaga nei.
Fai mai le Malo na o le 66 pasene o latou nei sa faatalanoaiga ina ua atoa le 18 masina o nofomau oloo faigaluega i galuega.
O le isi 34 pasene o le vaega lenei e leai ni galuega a o le mafuaaga na mafai ai ona maua le nofomau ona o le tuutuuga ia iai ni latou galuega e faigaluega ai ma tausi ai latou.
O le vaega lea o le fanau i le va o le 18 agai i le 20 tausaga le matutua oloo fia aumai e nofomau i Niu Sila o le a iai foi ni suiga.
O le a mafai ona aumai pea i latou i Niu Sila, tusa lava poo faigaluega i le Atunuu oloo malaga mai ai, pe afai lea e lei faia se aiga, e leai se fanau, ma sa faailoa e latou matua i le Ofisa o Femalagaaiga i le taimi na faatoa faatumu ai pepa talosaga mo le nofomau.
O le fanau oloo i le va o le 21 agai i le 24 tausaga le matutua o le a mafai pea ona malaga mai i Niu Sila ma talosaga mo se nofomau pe afai lea oloo iai se latou teugatupe tele e tausi ai latou lava ia pe a taunuu mai i Niu Sila.
Ua tele foi suiga ua iai mo latou e fia ‘sponsor’ se tagata e malaga mai e asiasi pe tafao mai i Niu Sila. O latou o le a faia le ‘sponsor’ e tatau ona faamaonia oloo mautu lelei se fale e nofo ai le tagata lea e malaga mai fafo.
E le gata i lea ia faamaonia e lava se tupe e tausi ai le tagata oloo malaga mai fafo.
O latou foi o le a faia le ‘sponsor’ o le a totogiina le pasese o le tagata sa latou ‘sponsor’ ina pe afai lea e toe faafoi ma le malosi le tagata sa latou ‘sponsor’ ina.
O le autu uma o nei suiga ua faia e le Malo ua faafaigata ai ona toe faatasi aiga ma mātua, faapea ma le fanau, pe afai lea e leai ni teugatupe e malaga mai ma latou, poo le vaivai o faailoga ma agavaa e o mai ma latou i Niu Sila.
