Faaliliuina mai i lipoti a le Asosi Siisii Uamea Mamafa
O se alii na manumalo i le pine siliva mo Samoa i le taaloga o le teuteu tino e pei ona tausinio ai mo le atunuu i Taaloga a le Pasefika lea na talimalo ai Niu Kaletonia.
Faaalia e lenei alii talu mai tausinioga i Niu Kaletonia ua taape lea ‘au ma o le toatele lava e faamautu ma nonofo i Niu Sila. Na o Sanele Mao ma se isi alii na agai atu i Samoa i lea autaaalo a le atunuu i Niu Kaletonia.
Faaalia e lenei alii o se isi itu na manatu ai e sui le taaloga e agai i ai ona o le matua maualuga lava o aiaiga i taumafa e tatau ona tausisi i ai tagata e tausinio i le taaloga o le teuteu tino.
O ia aiaiga e aofia ai le matua faasa ona taumafa se moa ae o loo pipii i ai se pa‘u. E matua sa isi aano o manu fasi sei vagana ai lava le i‘a. O ni aiaiga ua le mafai e lenei alii ona talia i aso uma e taalo ai.
O le masina lenei na faapea ona agai ai loa Mao ma avea ai ma sui o le au siisii a le atunuu.
E ui lava la o le auga o le tauvaga a le Asosi siisii i le faaiuga o le vaiaso na tea nei, na faia ma le taulai mo se au mautu o taaloga ia Iuni i Samoa nei, ae na tuu ai foi mo le avanoa mo i latou faatoa ofi atu i le taaloga e maimoa ma molimauina ia tausinioga.
Faaalia e le Peresitene o le Asosi, le alii faiaoga foi lea, Tuaopepe Jerry Wallwork, e ofi mai Mao i totonu o le Asosi, ua 32 i latou o loo ua i totonu o lea taaloga ma o loo toleni faaauau.
O Mao o se tasi o tagata e toaiva i ai tagata ua faapea ona ofi atu i totonu o le Asosi ma ua faaopoopo i le toa 32 e pei ona taua.
O se faailoga o le toatele o i latou ua iai le manaoga e tausinio ma avea ma sui o Samoa i lenei foi faagatama. Faaalia e Tuaopepe o le alii lenei o Mao, ma le taaloga sa iai, o le a faigofie ona faaauau ana tausinioga i le taaloga o le siisii uamea mamafa aua ua masani i le siisii i ana toleniga muamua.
O le faamuamua na ta‘ua e le alii faiaoga, o le agai loa o Mao e a‘o auala e malosi ai lana sii.
O le teuteu tino na ta‘ua e Tuaopepe e tele ina moomia le faaauau ona sii i le mamafa lava e tasi ae o le siisii e vaavaai i le suiga o mamafa o uamea ma e vave atu le manaoga e sii uamea nai i lo le taaloga o le teuteutino.
O le taimi e tāua tele i le taaloga o le siisii ma o le manino i auala e sii ai o le a vave ai lava ona faamautu le tomai o Mao i le suiga ua iai i lea taaloga.
Ua toafitu tamaitai ua i totonu o le taaloga lenei ae o i latou ia ua manatu Tuaopepe e tatau ona faatosina mai i le taaloga lenei, auā e tele le avanoa ua iai e tausinio ai i le Pasefika, Malo o le Taupulega poo le Olimipeka foi.
