Ua na o loimata lava ua vaaia i le tina o se fanau e toatolu mai i Magiagi na faatoa iloa le sola atu i Niu Sila o lona toalua ma avatu ai ma lana fanau ae na iai fuafuaga e a‘e i le vaiaso lenei i le Aoga a le Manumalo i Maluafou.
Ua tuu atu nei i le Ofisa o Leoleo i Apia faapea ai le Toomaga mo ē Puapagatia se tagi a le tina ia Leute Mataipule Tuugamusu ona o le fiu e tau saili si ana fanau ae maua tala i le afiafi o le Aso Toonai ua lele atu i Niu Sila Apolimatai Tuugamusu ma avatu ai ma lana fanau e toatolu o Tuugamusu e 11 tausaga le matua, o Atinae e fitu tausaga le matua ma Nova le pepe e tasi ma le ‘afa tausaga le matua.
O le fanau lenei sa i lo latou tamā na ave i ai e tafafao a o tau saili fofo lava le ulugalii i ni faaletonu ua tulai mai i lo la va, ae na iai lava le maliega e aumai tamaiti i lo latou tina e faaa‘e ai i le aoga i le vaiaso lenei ona ua a‘e aoga ae e lei toe faafoi ane lava tamaiti i le aiga o le latou tina na ola ma tausi ai i le tele o lo latou olaga tuputupu a‘e.
O le maua o tala i le Aso Toonai i le afiafi, ae ua tuai ua lē toe maua lana fanau o lea la ua agai ai loa lenei tina mafatia i le Ofisa o Leoleo i Samoa nei, agai i le Toomaga mo ē Puapuagatia atoa ai ma ofisa faasalalau ma nusipepa mo se fesoasoani.
O le tala a le tina e manao i lana fanau ae e faitalia lona toalua poo fea e agai i ai ae o le avatu o tamaiti e aunoa ma sona iloa, ua ia ta‘ua ua ave faamalosi atu lava ma o le talitonuga foi lea o le Toomaga mo ē Puapuagatia atoa ai ma le Ofisa o Leoleo, ona na ta‘ua e Leoleo e lei iai se maliega fai faatasi a le ulugalii ma e lei tetea foi i le tulafono, leai se mataupu faapea na ave i le faamasinoga ina ia maua ai e le tamā lenei le tausiga toatasi o le la fanau.
O se mataupu lenei ua faagasolo ai nei foi suesuega i le Ofisa o Femalagaaiga a Niu Sila i Samoa nei ona e maua o totonu o le vaiaso e tasi lea na faatatope ai le talosaga ma maua ai le visa o tamaiti.
O se alii sinia o le ofisa o Tiute ua suesueina i le agai i le Ofisa o Femalagaaiga i Samoa nei ma saini tusi talosaga o tusifolau ae o loo i le tina o le aiga tusifolau a lana fanau. O le faamatalaga na ave i le Ofisa o Femalagaaiga i Samoa nei, e fia maua tusifolau ona ua leiloloa uma tusifolau o le fanau.
O le sui na faia tusifolau nei ua suesueina foi ona o le leai o se faamaumauga o tusi talosaga nei na maua i le nofoaga o le ofisa e agai i ai talosaga. Ana lē fesiligia e se tasi o le aiga o lea tina e lē agai le tamaitai na faia tusifolau ma avane talosaga sa i totonu o lona ofisa.
“E tautala lava le tupe,” o le mau lea a se tasi o leoleo na agai i ai fesili o le suesuega ua faagasolo nei ma ua toatele lava i latou e foliga mai na galulue uma lava i le aveesea o le fanau a lenei tamaitai ma sosola faatasi atu ai ma le tamā.
O le popolega o Leute ona o loo iai lona masalosaloga e agai lona toalua e ave lana fanau i lona tuafafine o loo i Ausetalia lea ua leva ona manao e vaetama atu le la fanau ia te ia.
E aunoa lava se leo o le tina lenei i lea tulaga ae o lona mafatiaga tele o le olaga atoa o lana fanau, o lona aiga i Magiagi na soifua ai ma tausi ai e ona uso faapea lona tina a o galulue ma lona toalua. Ua leai se filemu i lo latou fale ae ua na o le fetagisi ma tau saili fesoasoani e toe faafoi mai ai le fanau.
Ua tele foi faamatalaga ua faasalalau e le tamā o le aiga ua faaleaga ai le tina i Samoa nei ma ua toatele lava ua foliga mai ua talitonu i faamatalaga nei se‘i vaganā ai le aiga o Leute aemaise o i latou ua fesootai pea ma lea ulugalii.
Faaalia e le Peresetene o le Toomaga mo ē Puapuagatia ia Siliniu Lina Chang, o le faafitauli ua tulai mai, ona o le tamaitai lea foi e tuua‘ia i le feeseeseai ai o lenei ulugalii ua lagolago uma lava tagata i le tamā o le aiga i ana faasalalauga fai solo ae nanā ai le tele o taimi e sauāina ai le tamaitai ma lana fanau.
O le taavale a le aiga o Leute na faafaigaluega e Leute ma lona toalua ia Apolima lea ua foliga mai ua faatau auā na alu lava ma Apolima i lona aiga. Ua fiu lea e tauanau lona toalua e agai atu e toe nonofo i lona aiga i Faleula ae ua leai lava le manatu o lenei tamaitai se‘i vaganā lana fanau o loo manao e tuu pea i lona aiga i Magiagi.
O le faafitauli lea na ta‘ua e le Toomaga mo ē Puapuagatia ua vaaia soo lava le faasinosinolima e aunoa ma ni faamaoniga o nisi o le atunuu, ma ua oo lava i ooooga faapenei ua aveese ai le aiā a lenei tina i lana fanau sa tele ina ona tausia i lana galuega, ma lona aiga.
Ua tuu atu la i Leoleo e fesootai atu leoleo i Niu Sila e faatatau i lenei mataupu.
