O le 1960 na faavae ai le asosi a tama ma teine Samoa sa sikolasipi mai i Niu Sila pei ona iai le afioga i le palemia Tuilaepa Sailele Malielegaoi, le afioga ia Misa Telefoni, le afioga ia Levaula Kamu, le susuga i le faafeagaiga ia Vaiao Eteuati ma le tele o tamalii Samoa sa iai i lena vaitaimi. O le susuga ia Leuatea Sio sa taulamua i le atinaeina ma le faamaopoopoina o le Asosi sei oo mai la i le taimi nei o le afioga ia Memea Bubsy o le toe ulutaia lea o le faalapotopotoga a tama ma teine i Niu Sila, ae o loo lagolagosua i ai le tofa ia Leofogaalii Peseta ma le mamalu o Peresitene a asosi taitasi i Aotearoa nei.
E faia pea ma faaauauina i tausaga taitasi lenei soo ina ia feiloai ai alo ma tamafanau a Samoa, o a outou lupe faalele aua le lumanai manuia o aiga, nuu ma ekalesia aemaise lo tatou atunuu pele o Samoa. O le Iunivesite o Matata Faapitoa poo le AUT ua lausilafia ai sa talimalo i lenei tausaga. Na amata i le ava o le feiloaiga ma sa faataunuuina i le Fetuao Hall a le Ekalesia Metotisi i Grey Lynn. Sosoo ai ma le sauniga Lotu ma le taumafataga matagofie na talimalo ai le Afioga i le Sea, Vaiao Eteuati ma le Ekalesia i Henderson i le Paepaeomanu Hall.
Ua faaigoaina lenei mafutaga o le Sootaga a alo ma fanau o loo aotauina i Iunivesite eseese e ono o loo i totonu o Niu Sila, ina ia faamautu ma faaolaola ma tapue a tatou tu ma aga.
“Lau Aganuu o lou tofi lea mai le Atua” le autu o lenei tausaga e pei ona sa faafofoga ma molimauina e le mamalu eseese o le atunuu, uo ma e masani aemaise matua na auai i lenei vaiaso atoa a o faagasolo a latou polokalame. I le tauvaga lauga sa faia i gagana e lua o le faa-Samoa ma le faa-Peretania, e faatatau i le autu o lenei tausaga ma na manumalo ai le Iunivesite a Canterbury mai Karaiesitete i le lauga faa-Samoa ae manumalo le Iunivesite a Vitoria mai Ueligitone i le lauga faaperetania. Sosoo ai ma taaloga ma faagatama, a o le Aso Lulu na fai ai le faaafe a le AUT ae taualuga loa i le aso na sosoo ai i faafiafiaga faaleaganuu lea na sola ai loa le Univesite o Matata Faapitoa AUT ma le manumalo.
E ese foi le vaaiga i lenei tausaga ona o le lava saunia o Asosi taitasi e le gata i le matagofie o togiga, o pese, o faafiafiaga, o le faaluma ma le saasaa a taupou taitasi aemaise le mataalia ma foliga fiafia o au faafiafia uma i lea po, o foliga vaaia ia o la tatou aganuu na atili ai ona faigata i Faamasino a latou faaiuga. Ae o le toatele foi o nisi o alo ma fanau sa auai na soifua mai i totonu o Niu Sila. O le tausaga fou la o le a faia ai lea faatasiga i Kalaiesetete i Canterbury.
Faatulagaina o vaega taitasi:
Togiga – Waikato; Taupou – Aukilani; Fuataimi – AUT; Faaluma – Waikato;
Pese – Waikato
Faatulagaina aoao:
1st (347 togi) AUT
2nd (328 togi) Waikato
3rd (305 togi) Aukilani
4th (265 togi) Vitoria
