O se tasi o fuafuaga faataoto mo tausaga uma a le Ekalesia A.O.G poo le Faapotopotoga a le Atua i Melepone ma Ausetalia atoa, o le faia lea o mafutaga faakoneferenisi a le itupa o tina ma tamaitai, lea e masani ona faataunuu i le masina o Me, fai foi koneferenisi mo le autalavou (Youth Alive) faapea ma le mafutaga faapea a tamā ma tamaloloa, lea e masani ona faataunuu ia Iulai.
O le afiafi o le Aso Faraile na tuanai atu, aso 20 ma le Aso Toonai atoa na faataunuu ai lea anavatau a le Ekalesia mo lenei tausaga, na molimauina le faatumulia o le malumalu ua fai nei ma nofoaga autū o le Ekalesia i Melepone, le Falesa o le Enjoy Church i Sunshine, i tamā ma tamaloloa e silia ma le afelimaselau 1,500 na afifio atu e tutulai faatasi o ni Toa o le talalelei, ae sii la latou viiga, ma patilimaina le faamanū, aemaise o le faalauteleina o o latou soifua faatuatua e ala i le faafofoga ma faalogologo i le folafolaina o le Upu faauuina a le Atua.
O se finagalo na faaalia i le Aso Toonai, e silia ma le ivasefulu 90 atunuu eseese na aofia potopoto e iai ma tagata atumotu o le Pasefika, e pei o Toga, Atu Kuki poo Rarotoga Fiti, Niue, ma Samoa, aemaise foi o uso mai Niu Sila.
O se tasi o itu e faatāuaina ai faamoemoe faapenei, ona e faamasani ai tagata fou o le Ekalesia ma isi sui.
O avanoa lelei foi e faafofoga ai i nisi o auauna faifeau a le Ekalesia mai isi Setete o Ausetalia, aemaise foi o nisi faafeagaiga o maualuga ma ta‘uta‘ua le faaaogāina e le Agaga o le Atua i tulimanu e fa o le Lalolagi, e pei ona autovaa mai ai se tasi o auauna lauiloa mai Amerika, lea sa fai ma failauga faapitoa (key note speaker), le susuga ia Pastor Keith Graft.
Na maitauina le faatupulaia o le fuainumera o tupulaga talavou Samoa ma le Pasefika e fiafia e auai atu i le mafutaga lenei, aemaise o tama talavou ma o latou tamā ma tuaa e sagisagi fiafia faatasi atu i le koneferenisi, o se tulaga matagofie lea, ona o tamā ua suia ma faaolaina soifua, ua fai ma faataitaiga lelei mo alo ma fanau auā se taeao manuia o aiga ma nuu, aemaise o Samoa.
