Ile to‘a 441 ole au faauu o tama ma teine talavou, o nisi ua matutua oloo galulue faiaoga ma isi matata, ole alo o Samoa mai le vasega faauu e toatolu ua maua faailoga Fomai mo le vaaia ma le suesueina o gasegase faapea le faia o taotoga, ua sili aoao ai le tama fanau a Samoa le susuga Nolan Alalatama Fuamatu. Ole vasega lenei e aofia ai ma se alii mai Tonga o Sione Fusimalohi Tuioneta ma le tamaitai mai Fiti o Pressycilla Prem Chand.
Ole faauuga foi ale Iunivesite ale atunuu ole tausaga nei, ua faaeaina ai ma se alo tamaitai o Samoa le susuga Susana Theresa Tauaa ile faailoga fomai ole Dr of Philosophy. O ia faatasi ma le tamaitai mai le atunuu o Trinidad and Tobago o Ramona Boodoosingh o tagata muamua ua sueina ma maua lea faailoga maualuga i totonu ole Iunivesite Aoao a Samoa. Ose tulaga maualuga lea ile faauuga ale Iunivesite o lenei tausaga e pei ona sa faataunuu ile faletaalo ole Iunivesite ile Papaigalagala ile Aso Faraile ua mavae.
Ose faauuga ese foi lenei ona ole toatele o alii ma tamaitai faiaoga ua faauu ai ina ua maua faailoga ole Bachelor faapea le Master ile tomai tau aoaoga. Ose tasi lea o faiga faavae e lei leva ni tausaga talu ona faamalosia ele Matagaluega o Aoga Taaloga ma Aganuu, ole unaia o faiaoga o Aoga maualalalo poo le primary faapea Aoga maualuluga le secondary e toe faalautele ma siitia o latou tomai tau aoaoga ile saili o faailoga ile Iunivesite a Samoa.
O nisi sa toatele iai le aufaauu oi latou oloo galulue faatausi soifua. O isi o faailoga maualuluga ile aoaoina o mataupu faasaienisi. Ole siitia pea ole numera o alo ma fanau ole atunuu aemaise i latou ua tino i matutua e saili o latou faailoga ile Iunivesite a Samoa ose matatia lea pe a toe tepa i tua ile tausaga e 1983 na amata faavae ai ele Malo le Iunivesite.
Na saunoa le Palemia ile saunoga autu susuga Tuilaepa L Sailele Malielegaoi ma ia toe faamanatu tulaga sa iai ina ua finagalo le faigamalo a Tofilau Eti Alesana e faatu se Iunivesite e agai iai alo ma fanau a Samoa. Faaalia ele Palemia sa tele faamatalaga i lena taimi. O nisi sa faapea ane ose mea ula ona e $5 tala na faavae ai le Iunivesite.
O nisi sa taufaifai ile Malo ona ole latou silasila ile fuafuaga ose mea taufaasee. Peitai ole taimi ole afioga Le Mamaea Ropati a‘o avea ma Minisita o Aoga sa tuu atoa lona silafia ma le malosi e saili ai ni fesoasoani mai fafo mo le faatuina ole Iunivesite. Ua 33 nei tausaga talu mai le 1983 ma ua maualuga le tulaga ua iai aoaoga o fanau ale atunuu ona ole Iunivesite.
Oi latou ua faauu i Tusipasi ma Faailoga maualuga mo lenei tausaga:
2 – Certificate of Commerce
10 – Certificate IV in Audit Teaching
14 – Diploma of Nursing
1 – Diploma in Accounting
48 – Diploma in Computing
1 – Bachelor of Health in Environmental Science
4 – Bachelor of Health Science (Medical Labaratory)
52 – Bachelor of Nursing
59 – Bachelor of Commerce
96 – Bachelor of Education (Primary)
70 – Bachelor of Education (Secondary)
3 – Bachelor of Medicine and Bachelor of Surgery
19 – Bachelor of Science
8 – Bachelor of Science Secondary Teaching
5 – Diploma in Commerce
8 – Diploma in Education
10 – Post Graduate Diploma in Education
3 – Post Graduate Diploma in Science
11 – Post Graduate Diploma in Development Studies
6 – Master of Education
6 – Master of Dvelopment Studies
1 – Master of Samoan Studies
2 – Dr of Philosophy
