Ua sefulutasi nei tausaga ole tautua ale Toomaga mo ē Puapuagatia ma ua mautu nofoaga e faia ai lana auaunaga i Upolu e lē gata o ofisa ae o fale ua faamautu ai tamaitai ma tina faapea fanau ua aafia ini sauaga solitulafono.
Sa iai le ofisa i Savaii ae na ose potu itiiti ile ofisa o Faamasinoga i Tuasivi. Peitai ole tuanai o tausaga e tele o taumafai pea e saili se nofoaga lelei mo Salafai, o lea ua faamatuu atu ele Matagaluega o Faamasinoga le fale faamasino tuai e faaaogā ele Toomaga ma ua telē ai le avanoa mo lana tautua i Puleono i Salafai.
O lea ua tatala aloaia le ofisa ua toe faatelē ma ua iai le ofisa e faato‘ai iai mataupu faapea ma se vaega ole fale e faamautu ai nisi e aafia ini sauaga. “Ole mau tauave ale HRPP, ole mea e lelei i Upolu e lelei foi mo Savaii ma nuu i tua, ole naunautaiga foi lena ole Toomaga e tulituliloa pea le mau tauave tāua i ana galuega fai. Ole afioga ile tamaitai faamasino o Tafaoimalo Leilani Tuala Warren na ia ooti le lipine e tatala ai le ofisa ole Toomaga ma ose laasaga lelei i galuega ale faalapotopotoga lea sauniga auā na faatino faatasi male faauuga o alii na auai i lana polokalame ole faatonutonu ole ita (Anger control programme).
Ole sootaga lea ole faamasinoga o aiga male Toomaga ona oi latou uma e faamaonia ni solitulafono e afua mai ini mataupu faalotoifale ile aiga, e tuuina atu ile polokalame mole toe faia ose galuega e faatonutonu ai le ita. Ua toatele le itupa o alii e mafuli i tamaloloa fai toalua faapea ma nisi o tina ua auai ile polokalame ona o solitulafono e pei ole fasi o tamaiti, fasi le avā ma nisi lava solitulafono e aafia ai totonu ole lotoifale ose aiga.
Na faaaogā le avanoa lea ele Toomaga male ofisa o faamasinoga e faia ai foi se isi ana polokalame i Savaii ole aoaoga mo nisi na auai ma fanau ale Kolisi o Tuasivi ole faamalamamaina ole tāua ole poloaiga e aumai ele faamasinoga mole puipuia ose tasi ua aafia ini faiga solitulafono.
Ole Protection Order ose aiaiga faaletulafono e talosagaina e leoleo poo le Toomaga ile faamasinoga pe afai ose tasi ua lamatia lona saogalemu ma lona puipuiga, ona ose gaioiga solitulafono. O lea poloaiga e tapu ai se tagata oloo tuua‘ia ona ia toe fesootai ma latalata pe talanoa foi ile tagata ua lamatia lona saogalemu.
Ua faatoa lua nei tausaga talu ona faatino i Samoa galuega ale faamasinoga ma leoleo faapea le faalapotopotoga ole Toomaga ole talosagaina o lea poloaiga.
