Siamupini Savaii i le tauvaga Mr Prime Minister 2013

E toafitu sui na lesitala suafa e fia tauva i le sailiga o le tagata e mafai ona ia faataitai le siufofoga o le alii Palemia susuga Tuilaepa Lupesoliai Sailele Malielegaoi, ma le faiga o ana saunoaga pe a feiloai ma le au faasalalau ma tusitala. Na taufetuli uma le toafitu lea e aofia ai ma se sui tauva tamaitai e toatasi.
O le autu o le tauvaga e pei ona faaalia e le faauluuluga o le leitio o le Mai FM 89.1 i Mulinuu o se tasi o tautua a le Samoa Quality Broadcasting o loo pulea le faletelevise o le TV1, le susuga Sioeli Taulealeausumai Alofaifo, ia maua le ‘ata toe mālie e faafiafia ai le aufaafofoga, ae ia maua ai foi se aoaoga tāua i le faafofoga a le atunuu lautele.
O le taimi muamua lenei ua faia ai se tauvaga faapea e se faleualesi faasalalau i lo tatou atunuu e autu i le faataitaiga o le siufofoga o le Palemia ma le faiga o ana saunoaga e pei ona faaigoa o le Mr Prime Minister (Mr PM).
O le amataga o le tauvaga na aliali ai le tau fai talenia uma o sui tauva i le faiga o saunoaga a le alii Palemia, lea e tuu tase‘i nisi o ana tali i fesili a tusitala i nisi o taimi, ae o nisi ona finagalo e tuusa‘o lava le gagana e faaaogā ai upu o talanoaga o aso uma, poo ni tala tausua foi. E oo lava i le taimi e tu‘itu‘i ai e le Palemia lana laulau a o saunoa e tali fesili sa faatino uma lava e sui na tauva. Peitai e pei lava o upu masani e tele vaa e tausinio i le tuuga ae tatau lava ona tasi le vaa e maua le tulaga muamua.
E toatasi na pa‘ū i le amataga o le taamilosaga o le pa‘ū ma nofo, sosoo ai loa ma le toafā na lalata i sui e toalua na tulaga ese lava le la tapenaga, e pei ona sa sailia ai e le alii o Lausiva ma Matualoto Kitiona poo ai o le a siamupini. O le faaiuga a faamasino e toalua na feagai ma le faamasinoina o le tauvaga e auaufaatasi e tuuina atu le manumalo ile susuga Lausiva Aloi mai Salelologa ma Vaitoomuli Savaii.
O le faaiuga foi lea a le 373 o i latou sa palota i le sui manumalo sa faaaogā ai fesootaiga telefoni feaveai a le Digicel ma le Bluesky, ae 102 na palota mo lē na maua le tulaga lua o Matualoto Kitiona.
O le Ipu ma le faailogatupe e tasi le afe tala na maua e le siamupini, ae 600 tala le tulaga lua. O le toafā o sui na lē manuia i le sailiga o le siamupini na maua faailogatupe faameaalofa e 400 tala a le tagata e toatasi, ae o le isi sui e toatasi na maua lana luaselau tala.
Faaalia e le susuga Sioeli Taulealeausumai Alofaifo, o le a toe faaauau le tauvaga i le tausaga fou ma le faamoemoe o le a siitia faailogatupe o i latou o le a mautulaga faapea foi i le siamupini. O se tauvaga lenei sa lagolagoina e le alii Palemia ina ua fesiligia e tusitala, i le saunoaga a le taitai o le Malo, o se polokalame tāua e maua ai le ‘ata ma e mālie foi i le faafofoga a le atunuu.