Ole tumutumu ole Lalolagi ua tulai ai Fiaoo Faamausili ma lana au ole Black Ferns a Niu Sila (NZ). Ina ua manumalo ile taaloga faaiu ole Ipu ole Lalolagi a Tamaitai lea na fai i Aiealani ile taeao ole Aso Sa. “Ua faatumulia au ile fiafia ua ile tumutumu ole Lalolagi i matou, ina ua tali mai le au ile po lenei, ma ose le tali foi lea e sili ona lelei e taualuga ai lou ai lou taimi ile Black Ferns.” Ole tali lea a Fiaoo ina ua fesiligia o ia ina ua mae’a le taaloga ma Egelani.
O lona malolo ritaea ai mai le taaloga, na faateia ai le faalogo ale faiaoga ale Black Ferns o Glenn Moore. “Ma te lei talanoa ma Fiaoo i lea tulaga, ae se’i iai se taimi ona ma talanoa lea, auā ua lagona lo’u faanoanoa ile taimi lenei pe aafai ole tulaga lea ole a iai le faaiuga a Fiaoo e malolo mai le au.” Ole saunoaga lea ale alii faiaoga
Ole lima ai lea o Ipu ole Lalolagi ua taalo ai le tamaitai mai Faleula, Aleisa, ma Fogapoa i Savaii. Ae ole mea e pito sili ai ona tāua le manumalo lenei, auā ole aso tonu lenei e atoa iai le 16 tausaga talu ona tuualemalo e lona tuaa.
“Ole aso lenei ile 16 tausaga talu (2001) ona maliu ai si ou tama. O ia sa lagolago tele i lou i lau lakapi” O lona uiga ole tausaga 2001 na maliu ai Faamausili le tuaa o Fiaoo, ao le tausaga 2000 na amata taalo ai o ia mo le au a Niu Sila.
O lea alo o Samoa, ua leva ona avea o ia ma tamaitai taalo a Niu Sila (NZ). E sili atu ana taaloga mo NZ nai lo se isi lava. Ole taaloga ma Kanata ile Ipu ole Lalolagi na atoa iai le 50 o ana taaloga mo NZ.
Ae ole taaloga faaiu ma Egelani e atoa iai le 52 o ana taaloga ile ofu uliuli.
E le ose taaloga faigofie le taaloga faaiu. Aua e fou pea i lagona ole au le faiaina ole Black Ferns ia Egelani ile masina o Iuni talu ai. E lei galo la ile Ferns lea faia’ina. Ae e le o galo foi ia Egelani lagona fiafia ole manumalo ia NZ.
O NZ na muamua sikoa ae na misi le aa. Sosoo ai lea ma sikoa sosoo e lua a Egelani. Ole faaiuga foi lea ole ‘afa muamua na 17-10, e lua sikoa, ova uma aa faaopoopo iai ma le sala e tasi.
O NZ na muamua tali ile afa lona lua, ma faapea ai ona taufao le malo ole taaloga. E ui na taalo malosi Egelani ile afa lona lua, ae na malosi atu ai le taofiofi o tamaitai ofu uliuli.
Na sefe le taaloga ile toe 12minute o totoe ina ua toe sikoa Winiata ma ova le aa ale kiki polo (Cocksedge). O ‘ai na iai ae toe 10 minute o totoe e 41 NZ ile 25 a Egelani. Na fiafia lava NZ e taalo ile taimi ma taofiofi le polo seia uma le taimi. Ua tapena ai nei Fiaoo e faamavae ile taaloga na fai mo ia mo le 17 tausaga. Ae o lea foi i lana galuega masani ole Leoleo Suesue i Aukilani.
E le galo pea e ia lona tuaa o Faamausili. Fai mai Fiaoo, ole naunautaiga o lona tama mo ia, lea na avea ma faamalosi au ia te ia seia oo ina saofai ile tumutumuga ole lakapi.
Ae e le galo ai lona tina matua, o Nasareta Faamausili, 73 tausaga, na tapuaia le taaloga a Fiaoo, aunoa ma se leo i lona fale i Aukilani. Fai mai le uso o Fiaoo, ole masani ole tina pea taalo Fiaoo, ole leo tele lea i taimi o taaloga, e pati ma po lana tapuaiga.
Ae e ese ai lenei taaloga, ona o lona maualuga ma lona taua, fai mai Etta Jones le uso o Fiaoo, nao le sioa lava ole tina, aunoa ma se leo, seia vagana le taimi faaiu ina ua uma le taaloga na lagona atu ai lona leo ae ua mautinoa le manumalo o Fiaoo ma lana au ile Ipu ole Lalolagi.
Ua ausia ai e Fiaoo Faamausili ile tumutumu o lana taumafai ina ua manumalo lana Black Ferns ile Rosa Mumu a Egelani ile Ipu ole Lalolagi.
E 52 ana taaloga faavaomalo, Kapeteni o ia ile au a Niu Sila, o ia lava ole tumutumu o mitamitaga o lona aiga ma lona nuu. Faafetai tele Fiaoo. Ia manuia ou laasaga uma mo le lumanai.
NZ 41 (Tries, Winiata (2), Cocksedge, Natua (3), Smith; Cons Cocksedge 3) England 32 (Noel-Smith, Thompson, Penalty try; Scarratt 2 cons, 2 pens).
