Ua siamupini nei mole taimi muamua le Cronulla Sharks ina ua manumalo ile Storm e 14-12 ile sailiga fusi ole NRL 2016 faatasi ai ma alo iloga o Samoa ia Ricky Leutele ma Sam Tagataese. Ole taimi muamua lenei ua suipi ai le Sharks mai le 1967 na faavae ai le kalapu.
Ma ua alu le vaiaso o faafeai ele autusitala Cronulla pe latou te mafaia lenei matatia ise siamupini muamua. O alo o Samoa ia Faamanu Brown, Jesse Sene Lefao, Sam Tagatese ma Ricky Leutele na telē so latou sao ile oo mai ole Sharks ile suega siamupini.
Ae peitai na‘o Sam ma Ricky na saofia mole fetauiga fita male Storms na vaaia le matagofie o laua sao ile taaloga lea na sikoa muamua ai Ben Barba ova le kiki faapea se sala maua ai e 8-0. Na toe apata mai Melepone i ana sikoa e lua ma sili latou ‘ai 12-8 ae ole minute 69 ole taaloga na mataina ai le gaioiga a Fifita ma Ennis ma faatavilivili atu ai Fifita mole sikoa manumalo 14-12.
E ui ina malosi atu le faatini ale Storm ma semanu lava e toe sikoa ma manumalo ai, ae na lelei le puipui ale Cronulla seia uma le taaloga ma taunuu ai le miti ole Manumalo ile Taamilosaga NRL 2016.
Ole toe tatao atu ale Sharks na vaaia ile ulufale atu i totonu ile ‘afa mulimuli o Sam Tagataese ma unaia ai le foueki male puipuiga a Ricky Leutele.
Ile uma ole taaloga na lē gae‘e le tusa male 83,625 na maimoaina le faamoemoe ile malae ale ANZ, lea foi sa maligi ai loimata ole kapeteni ia Paul Gallen.
Ole alii ia Luke Lewis ole Sharks na mauaina le faailoga ole tama taalo ole taaloga, ae mo alo o Samoa ia Jesse Sene Lefao, Faamanu Brown, Tagataese ma Leutele, ua tatali nei pe malaga atu i Samoa mole taaloga a Fiti male Toa Samoa.
