Siamanupini Junior Tafa-Milo – Fusi o le paga mamafa i le fusukiki – Sini Ausetalia

Na matuā iloga ona solovī ane i lalo le alii Ausetalia o George (Bundy) Mladenov, ina ua taia lona muaulu i tulivae malolosi (knees-head knockout), o le alii Samoa o Junior Tafa-Milo, i le taamilosaga tolu.

O le la faipelega fusukiki (kickboxing) i le Aso Toonai ua mavae atu nei, ua faapaleina ai le saili malo o lenei alo Samoa, i le fusi o le Australian MASA (Martial Arts Sports Association) Superheavyweight K1 Champion. O le 3 ai nei o tausaga, talu ona aumau i Ausetalia lenei alii talavou ma lona aiga, ma sa aoaoina uma i latou ma nai ona uso matutua i le Kolisi a Avondale College i Aukilani.

O se taaloga sa matuā faatumulia ai le fale mataaga o e Gosford League Club, i New South Wales, Sini, Ausetalia, i le faaiuga o le vaiaso na tea nei.

Sa maitauina foi le toatele o tagata na lagolagoina le alii Ausetalia o Bundy, 32 tausaga, ma o lana fusuaga lona 35 foi lea, aemaise sa faatinoina i le aai tonu e aumau ai lenei alii.

Ae peitai, na matuai malolo lava, ina ua lavea i tulivae o le alii Samoa o Junior, 18 tausaga, o lana fusuaga lona 7 lea (4 total knockouts, 2 manumalo, 1 faia‘ina).

E alala o ia ma si ona tina ma nai ona uso i le aai o Toowomba, i Kuiniselani, pe tusa ma le 2 ma le ‘afa itula le mamao mai le aai tele o Brisbane i Ausetalia.   

Saunoa le faletua ia Amanda Fuaolefau Pati Tafa, le tina o le alii o Junior, mai  le afioaga o Mulifanua, “ua leai se isi tulaga e sili atu nai lo le agaga o le faagaeetia ma le faafetai i le Atua i lana tali faaaliali i le taumafai o le fanau, faapea le tapuaiga a aiga ma ekalesia, aemaise e lē faigofie tapenaga sa feagai ai.”

E lē gata i lea, o se tasi o ona mitamitaga ina ua faaauau e nai ona alo le faagatama faipele, sa lauiloa ma faananau i ai le loto o si ona tuaa sinasina, le afioga ia Fuaolefau Pati Tafa. O le lagona foi lava lea e tasi o le susuga ia Mani Asiata Milo, le isi tuaa o le alii o Junior, mai le alalafaga o Faletoi, Satupaitea i Savaii.

O le alii o Junior o le lona tolu o alo e toafā ae ole uii foi o le tafatolu a le Tafa-Milo Team, o alo ia e toatolu o le susuga ia Mani ma le faletua ia Amanda, e taufai finau uma i lenei faagatama.

O le latou ‘au o loo i lalo o le faamalumaluga a le kalapu fusukiki mai Toowomba, o le Team Ngapuhi Muay Thai (Australia), lea na amata mai ai i le tausaga e 2013. O lea taaloga (kickboxing)  e lē gata ina faaaogā ai le malosi ma metotia  faafaipelē i lima, a o tulilima,  tulivae ma le kiki.

O le lona lua o lenei auso, o le alii o Justin. Sa iai lana fusuaga i le masina o Me, i le fusi a Kuiniselani ma manumalo ai i le alii o Jacob Francis mai le Gold Coast ina ua taofia fusuaga i le taamilosaga e 4.  O Oketopa o loo alo atu ai Justin i lana fusuaga i le fusi a Ausetalia, le WKA QLD State K1 Super Heavy Weight. O le fusi lea o loo umia i le taim lenei e se alii mai Kuiniselani.

Ae o le ulumatua le alii o Gerard, ua 6 ana fusuaga (5 manumalo, 1 tko ma le 1 le fusuaga tutusa). O loo ia galue malosi faafaiaoga lagolago, i le toleniga ma tapenaga o loo alo atu i ai le latou tafatolu aemaise le alii o Justin i lana fusuaga i le masina o Oketopa.