E galo uma tiga ma le vaivai pe a tini le tausinioga o le faamoemoega ua leva ona moemiti i ai mo le lumanai manuia.
O le naunautaiga foi lea o mātua e unai fanau i avanoa ua maua i totonu o aogā e faalautele ai lo latou iloa aemaise lava o le poto salalau. O le sini lava ma le autu o loo taoto i finagalo o soo se matua, ia aua ne‘i ola faalolo le tama poo le teine i le lumanai.
O le fua o le onosai ma le tauivi malosi, aemaise o le vaai alofa i mātua ma le tapuaiga, o le faaeaina lea o le taumafai ma le siitia o le igoa o mātua ma aiga.
O le aoauli o le Aso Faraile ua mavae 21 o Novema na faatumulia ai le Vodafone Events Centre i Manukau i mātua ma aiga aemaise o uo na agai atu e molimau le tauaaoina o tusipasi o i latou ua faaeaina lo latou taumafai i totonu o le aoga a le Te Puawaitanga i Tamaki i Manukau.
E silia i le 100 le aufaauu mai atunuu eseese ae filo atu ai ma Samoa i totonu o lenei faalagamaea. O le aso foi lea na vaaia ai le toatele o tamafanau o Samoa o loo finauina pea avanoa aoga i totonu o lenei atunuu, auā e silia i le 30 tama ma teine na faamanuiaina ai i lenei faauuga.
E eseese lava mataupu na faauuina ai le toatele, ae o nisi o alo e 3 o Samoa na maua a latou tusipasi i le Certificate in Health and Fitness Leadership i le Level 4 o le susuga ia Otine Junior Fanoga, Elia Junior Dominic Taualapini ma Raymass Chrichton.
E tasi ma le ‘afa tausaga na aotauina ai nei fanau i totonu o nei aoaoga ma faamanuiaina ai lo latou taumafai. O se faamanuiaga foi lea i mātua i le latou nofo tatalo ma tu‘i pea le mulipapaga i aso taitasi a o alo fanau i le sailiga o le poto.
Ua tele ina lagona ai foi le faitau e masani ai le atunuu, ‘O le tama poto e fiafia ai le tamā a o le tama valea e faanoanoa ai le tina.’
