E lē toe taumateina pe faalafi liloina pe ufitia foi le tulaga siitia o lenei faagatama o le Lakapi i polokalame faagasolo i tausaga taitasi a le Auckland Samoa Rugby Football Union.
A toe silasila i tausaga ua mavae i le tau faafaileleina mai o lenei atinae o le Lakapi mo alo ma fanau a Samoa i Aukilani, o se tulaga e tatau ona tatou patipatia faatasi e iloa ai lo tatou felagolagomai, galule soosoo tau‘au, ina ia siitia ma tatalaina faitotoa e manuia ai tamafanau a Samoa i le lumanai i lenei faagatama. E maitauina pea i tausaga uma le fiugofie, fulitua vave ma le tele o isi uiga faavaivaigofie i tapenaga i le faamautuina o ni taiala lelei mo le agai i luma, ae momoli pea le agaga faafetai i le lē fiugofie i le toatele o nisi a o lamalama faaiu ai taaloga, ma le taamilosaga a le Aukilani Samoa i ana taaloga taitoafitu (Sevens Tournament).
I le faaiuga o le vaiaso na se‘i mavae atu nei, ma na saunoa ai le Peresitene ia Aiolupotea John Roache ma ia faapea ai: “O se tausaga faaeaina, tausaga finau ma o se tausaga siitia i sauniuniga o ‘au taitasi”, ma ua talitonuina le lē toe faatamala o se ‘Au i lenei taamilosaga, o se fiafiaga tele foi lea ua faafaigofieina ai galuega ma tapenaga o lenei tausaga.
Ina ua fesiligia Aiolupotea, na ia saunoa ai ua lē o toe faatamala se ‘au, ua tutusa uma le lelei o ‘au i lenei tausaga i iloa i le tulaga i sailiga Siamupuni, ma ua finau uma le tele o ‘Au. Talosia ia tulai mai foi lea tausaga fou e sili atu foi lona tulai mai.
Ua nofo sauni atu nei le Aukilani Samoa i le faaiuga o le vaiaso nei i le tufatufaga faailoga e taualuga ai taamilosaga, ma e faafetaia ai ‘au taitasi i le tulaga maualuga na mafai ona ausia i le taamilosaga o lenei tausaga, ma le faamoemoe e alafai mai i lea foi tausaga ma nisi foi faasinomaga fou e atili siitia ai pea lenei atinae o le faagatama o le Lakapi mo le lumanai.
O se taaloga mataina le Finals o le Taitoafitu a le Aukilani Samoa i le va o Apia Maroons ma Marist Old Boys, lea na mae‘a le taaloga ina ua manulalo Apia Maroons i ‘ai e 22 i le 17 a Malisi. Ua avea ai foi la Apia Maroons o le Siamupini o le Taitoafitu a Aukilani Samoa o le 2012.
