Ole faalima ai lenei ona faatasitasi ole aiga Taulapapa (family reunion) e opogi le aiga i ana tamafanau oloo tuputupu a’e ia malamalama i lo latou tupu’aga ma le gafa.
Ose faamoemoe oloo vaaia le agaigai pea i luma mai i lona amataga, ma ua uluola le aiga ma ua faamanuia le Atua mai le pogai a’a seia oo i ona fua.
O Tagaloa Kokamo Levaigaomata II ma Laloua Taupa’u Pauesi mai Manono, na o la fanaua Taulapapa Saipani. E fa usuga na tutupu mai ai lana fanau e to’a sefuluono (16).
O fanau o fanau e to’a valusefulu ma le tolu (83).
Ole augatupulaga tolu ua luaselau sefuluono ile taimi nei. Ole augatupulaga fā, e toa fitusefulu ma le tasi ile la tausaga 2017 – 2018.
Ole tausaga 2007 na amataina ai nei faatasiga (reunion) i Elsdon Porirua Niu Sila. 2010 Gold Coast i Ausetalia, ma le 2013 o Otaki Niu Sila.
Na asia e lenei aiga Taulapapa le Vaisala Resort i Savaii ma faaiu i Fogapoa i Savaii le latou faamoemoe ole tausaga 2015 – 2016, ma na faafeiloa ai foi ele afioaga o Fogapoa ile ‘ava ole feiloaiga.
Ile faaiuga ole la tausaga 2017 – 2018 na faatasia uma ai le aiga i Snells Beach Retreat Center i Aukilani Niu Sila, ma faamautu mai ai le numera oi latou na tupuga mai le tamā ia Taulapapa e to’a toluselau valusefulu ma le ono (386).
Ole manulauti ole faatasiga o lenei tausaga (Faamamaluina le Tuanai, Fusia le manuia o ona po nei, ma Opogi le Lumanai. (Honoring the past, Uniting the present, Embracing the future)
Na malaga mai nisi mai Samoa, Brisbane, Sydney, Melbourne, Invercargill, Hastings, Napier, Ueligitone ma Aukilani. Ua na’o se vaega na mafai ona faatasi mai i lenei tausaga 2017 – 2018.
Ta’ua e le tasi ole sui ole aiga Taulapapa Leata Alaimoana-Roberts mai Brisbane Ausetalia, “I lenei faatasiga, ole pito i itiiti ole aiga na auai i lea faamoemoe e 2 masina le matua, ma le tagata pito i matua e valusefulu ma le fa (84) tausaga ole tamā ia Taulapapa Pati.”
“Ose faamanuiaga le vaaia ole uluola osi o matou aiga. Ua fai i lagi le folauga a nisi, peitai oloo iai pea pepe fou oloo fananau i totonu o tausaga taitasi ma avea ose faamanuiaga isi o matou aiga.”
“Ole faakerisiano le ogatotonu o a matou faatasiga; e faafetaia le Atua i mea uma ua ia faia ma faaaogā iai fanau a Taulapapa e auauna ai ile galuega ale Atua”.
A’o tuputupu le aiga ma faamanuia le Atua i ona tupulaga fai mai, oloo ua iai se talafaasolopito ole aiga nei oloo faailoa i lea tupulaga ma lea tupulaga.
Ole mafuaaga ole igoa ole tamā ia Saipani Taulapapa. O lea talaaga ose itu e patino ile aiga, ma e lē o fia faailoaina.
Ua iai foi talafaasolopito ole aiga ua uma ona faamaumau auā tupulaga fai mai ole aiga Taulapapa. Ile taimi nei, e to’a 5 le fanau a Saipani Taulapapa oloo soifua mai, mai le to’a sefuluono (16) mai usuga e fā.
O Saipani Taulapapa e mai i afioaga o Gataivai, Sili ma Fogapoa.
Oloo iai le faamoemoe o lenei aiga mo le tausaga 2020 e faia lea ile motu o Fiti, ma ose tulaga ua tulimatai nei ele aiga o Saipani Taulapapa.
