Ua savalia le tausaga talu ona pulea e le faletua ia Tofiga Tuigamala le fale lavalava o le B&T Island Style i le pitonuu o Hampton Park.
O loo faatamoe faatasi ai ma lana tautua le B&T Finance lea ua atoa le lima tausaga talu ona tautua ai mo tagata Samoa i le aai o Melepone. O le ala lea ua a‘e ai se finagalo o le faletua ma le ofisa mamalu ina ia faamanatu faatasi le tasi tausaga o le faleoloa, ma le lima tausaga o lana tautua faufautua mo tupe (finanacial advisor).
O le Aso Toonai nei aso 27 lea ua faataoto e faataunuuina ai lea faamoemoe tele o le auaunaga i Hampton Park lava. Ua faailoa mai o nisi o tamalii lauiloa mai Niu Sila pei o Cindy Samoa ma le susuga ia Mr Gago mai le aai o Aukilani, ma le susuga ia Felise Mikaele mai le aai o Ueligitone o loo lautogia e faafiafia mo Aso Soifua o le B&T.
Ua lausilafia e le mamalu o le toatele le tautua mae‘ae‘a a le faletua ia Tofiga aemaise lava o le faatumuina o tax ma le liliuina mai o alo ma fanau mai Samoa. E talitonu le faamoemoe o le a sagai atu le mamalu lautele o le atunuu e lagolagoina le faamoemoe.
