Sauni le Malo i le faalelegapepe o le 2013

O le masina fou lea ua faamautu mai ai e le Malo o le a faatautaia ai le Faalelegapepe o lenei tausaga mo falelalaga uma o le atunuu.
O lea ua iai le finagalo o le Malo e faamatuu atu se tinoitupe e tusa ma le $5000 i soo se falelalaga lava e asia ua o latou ausia le aofai o ie tosi tasi e 10. Mo le tosi lua, i le aofai lava lea e 10 o le a maua se tinoitupe e $2000.
E lē o faamalosia mo le faalelegapepe o lenei tausaga lea tulaga ae o le a faapea ona asia pea falelalaga o le atunuu mo lea faamoemoe. Ae o le faalelegapepe lava ia ua tatala le avanoa i soo se falelalaga ua i lalo o le polokalame lenei a le malo e faalele ai a latou galuega sa fuafua mai i le tausaga ua tuanai.
O le faalelegapepe lea sa tuu atu ia Tesema o le tausaga ua tea peitai o aafiaga o le afā na lē mafai ai ona faatino lea tulaga ae o lea la ua faamautu mai e le Afioga i le Minisita polokalame o lea taumafaiga tele a le Malo.
I se faatalanoaga ma Tusitala i le faaiuga o le vaiaso na tea nei na faaalia ai e le afioga i le Minisita o Mataupu tau Tina ma Tamaitai, Atina‘e o Nuu ma Aga Fesootai, le Afioga Tolofuaivalelei Falemoe Leiataua, o lenei faamoemoe o loo fuafua e faia i Upolu faapea ai le motu tele i Salafai.
O le aso 9 o Me o le a faatino ai le faalelegapepe a Salafai ma Upolu i le aso e sosoo ai.  E pei lava ona molimauina i tausaga ua tuanai e ave lava meaalofa mo i latou e oo atu i taimi o falelalaga ua mae‘a ona o latou lalagaina le ie lea o le iniini i lona tosi tasi ma le tosi lua aemaise o le siapo.
O loo iai le naunautaiga o le Malo e pei ona saunoa ai Tolofua, o le a toe teuteu le Tulafono o Measina a Samoa, 1955 ona o le agaga lava lea o le faamalosia ma le unai pea o falelalaga ma mafutaga a tina o afioaga taitasi e tapena pea ma faatāua le ie Samoa poo le iniini Samoa aemaise ai le faamalosia o le fua a le Malo ma le ituaiga ninii e iai le ie lea ua ta‘ua o le Ie o le Malo, o le ie sae poo le iniini.
O nei tapenaga o loo feagai ma le Komiti faapitoa o Measina, lea o loo taitaifono ai le afioga i le Palemia, Tuilaepa Lupesoliai Sailele Malielegaoi.
“O le agaga o le Komiti, e lē o le vaai tualafo i le tou finagalo, peitai a tatou vaivai e unai le tamaoaiga lea, lipoti a le matagaluega e ala i asiasiga, sologa lelei pea tou galuega, faiva alofiaao, measina a Samoa e faatino ai a tatou tu ma aganuu, o le tulaga lena o le a faaauau ai pea faalelegapepe ia Me, pe a tuanai le masina lenei.”
I le matau a le Komiti, na saunoa ai le alii Minisita, o loo lelei lava le tele o galuega faatino a falelalaga i Samoa nei ma o le mafuaaga lava lea o le faaauau pea o faalelegapepe ma le faalauiloa o faamanuiaga e maua e falelalaga pe a lelei le gaosia o ie ma measina a le atunuu.
O le fua faataatia a le Komiti mo lea faamoemoe, e 12 futu le umi o le ie Samoa ae 9 futu le lautele ina ia mafai ona ausia uma e le tele o falelalaga.
O le isi itu o le polokalame, ua taumafai nei le komiti e faalēaogā ie tetele malo o loo matauina o loo faaaogāina i le tele o faalavelave, ae ia tepa taulai e faaaogā loa le ie sae poo le ie Samoa auā le faalauiloaina o le tāua o lea measina a Samoa.
Na faailoa mai e le afioga ia Tolofua e $25,000 – $50,000 se vaegatupe lea ua faatulaga mai e le Komiti e faatupe ai lenei faamoemoe tāua.