O loo loma nei i le faaiuga o le vaiaso le isi fusuaga a le alo o Samoa Joseph Parker, o le lona sefulu ai lea o ana taaloga talu ona taalo faapolofesa ma le talaaga, manumalo sasa‘o fusuaga e iva, valu KO.
E tusa ai ma tusitusiga i luga o upega o fesootaiga, o le alii Amerika 33 tausaga le matua, Keith Thompson lea o le a fetaui ma Parker i le Aso Sa nei, e lē o se tagata ua logologoa ni ona talaaga i lenei faagatama o faipelega i totonu o Amerika, e oo foi i le pulega a Parker e lē o manino tele foi i se talaaga fusu o lea alii Amerika, ona o lea faatoa fuafua i se taimi vave, se‘i vaganā ai le faailoa mai o ia e masani ona toleni faatasi ma sipā ma se tasi o alii fusu Deontay Wilder o loo aave mai tala e ono lu‘iina le fusi o le lalolagi, e lei faiaina lava i ana fusuaga e 31.
O Thompson e fitu fusuaga, lua faiaina ma e galue o se alii ofisa fuimu i Alabama Amerika ma o loo iai foi i le vaega a le Navy a Amerika. O le tele lea o lona taimi ma toleni ai, o totonu o le militeri a Amerika. Peitai o le olaga amata o ana fusuaga, mai lava i le 16 o ona tausaga, o lona lea fiafiaga e ui i le pisi i galuega atoa ma lona aiga, ae manatu Thompson ua lava tapena mo lana taaloga ma Parker.
Ua vaai i le fusu a Parker ma ua faamoemoe e ono maua ai sona avanoa e fusu ai i totonu o Niu Sila pe afai ae iu manuia lana taumafaiga lea.
O Joseph Parker o loo laualuga lava lona malosi ma le saoasaoa o le faagaioia o le taaloga pe a fua atu i fusuaga ua mavae i le lua masina ua tea ma Brian Minto 39 tausaga mai Amerika, KO i le taamilosaga valu, o se fusuaga sa manatu nisi e faigata pe a faatusa i le lē talafeauga o tausaga o le matutua o nei alii fusu, ae o i e manatua ai le tala e masani ai, e laititi lava ae maini.
E lē galo foi le fusuaga ma le Buffalo Paepae o Francois Botha lea na uma lava i le taamilosaga lua i le 2013, o Botha foi lea na ia faaigoa le tatou tama o Baby Joseph, ae na o na tatagi lava o le patua i lalo fai mai loa ua lē o toe pepe le tama, he’s a big man. Lea la ua sauni Parker mo le taaloga o loma nei ma le faamoemoe e ono faaopoopo ai pea le iuga lelei o ana fusuaga, leai se faiaina, ae talosia ia.
Ua atoa nei le masina o tolauapi Parker ma lana aumalaga i Amerika e faasauni ai mo lana fusuaga, ma ua ia faailoa mai foi i tusitusiga lona lava tapena, taimi atoa o le toleni lava i le gym ma ua lava foi le malosi, ua lava ma totoe foi le masina e toe faafoi ai lona tino ia paleni lelei ma ua sauni i lana fusuaga.
Fai si matua o Thompson lea o le a fetaui ma le tatou tama, ae afai na mafai e Parker ona faamo‘amo‘a le Buffalo, aisea o le a lē mafai ai ona faavavai foi le alii fuimu?
O le Aso Sa nei le fusuaga, 10 o Aukuso i le 11:30am taimi Niu Sila, e faia lea i Sands Casino i Bethlehem Pennsylvania Amerika.
