E 80,000 tagata Ausetalia na matamata ile taaloga ale Socceroos ma Honduras, le taaloga lona lua, ile ANZ Stadium i Sini. Na tutusa le taaloga muamua i Teguchigalpa, Honduras 0-0. Ole faamoemoe o Ausetalia ia manumalo ia Honduras, e sā le tutusa, auā e sao ai le atunuu mai Amerika Tutotonu ile FIFA World Cup i Rusia ile 2018.
Ole taaloga tāua tele ile Aso Lulu, e uma ane, ua malo Ausetalia 3-1 a Honduras, ma sao ai ile WC i Rusia. Ole tulaga maoae, ole faafā ai lea ona sosoo avanoa a Ausetalia ile WC: 2006 i Siamani, 2010 i Aferika i Saute, 2014 i Brazil, ae o lea ole a toe alu ile WC ile 2018. E na’o le tasi lava le isi taimi na au ai Ausetalia ile WC, ole tausaga 1974. Ae o lea ua sosoo Ipu e Fā, o sao lava Ausetalia. I talafaasolopito ole WC, o Ausetalia e 11 iai atunuu ua sosoo Ipu e Fā, o tausinio pea.
Ae ole sosoo ai foi lea o Ipu e Fā, o taalo ai foi ma Cahill. E le ose fuainumera e masani ona maua e se tagata taalo soka. E na’o le toalima isi ua sosoo le faafā, e iai Pele o Brazil, Diego Maradona o Argentina, Roberto Baggio o Italia, Ronaldo o Brazil, Thierry Henry o Falani ma Bobby Charlton o Egelani.
Ae o lea ole a ofi atu iai ma Tim Cahill i lea saofaiga maualuga. E tasi le isi Ausetalia na iai faatasi ma Cahill i taaloga uma nei, ole a sosoo ai foi ana Ipu e Fā, peitai, e lei taalo i isi taaloga a Ausetalia ile WC, faato’a sao i totonu ole malae i Rio 2014. O lona igoa o Mark Milligan.
Ole isi fuainumera matautia, na sikoa Cahill i taaloga uma ia a Ausetalia ile Ipu ole Lalolagi, a toe sikoa i Rusia ole a saofia o ia ile isi maualuga o tagata na sikoa i Ipu e Fā. E iai Pele ma le isi toalua. E faasino ai iina le tāua tele o Tim Faaliga Cahill ile ‘au a Ausetalia.
Ua ova ma le selau, 104 ana taaloga mo le atunuu, ile 50 sikoa ua ia maua. O isi o ana sikoa tāua lea na maua i taaloga ole Ipu i tausaga ua mavae.
Ae ua o tutusa le manuia o Ausetalia ma le maualuga ai ole taalo a Cahill lea na uluai taalo mo Samoa U20s ile 1994. E ui e lei sikoa ile taaloga ma Honduras, ae na matuā viiviia e tagata maimoa Cahill ina ua sau i tua ae toe 20 minute ole taaloga o totoe.
Na umi ona tutulai tagata maimoa ma patipatia le sao o Tim Cahill.
Oloo iai le filifiliga a Cahill e fia fai e tapena ai mo le WC i Rusia, e ono aafia ai le ‘au oloo taalo ai nei i Melbourne City ile A-League a Ausetalia. E manao Cahill ina ia taalo ise ‘au maualuga e tapena ai mo Rusia. E lē o maua lea tulaga maualuga ile ‘au ale Melbourne City.
Ae ole isi tulaga tāua, e atoa ile 2018 le 38 tausaga ole soifua ale alii. Oloo iai foi lona faaeteetega ina nei te’i ua iai se aafiaga mo ia a’o loma le Ipu ole Lalolagi.
