O loo taumafai le malo o Niu Sila e saili se auala e ofi atu ai i le Super Rugby se ‘au a le Pasefika e aofia ai Samoa, Fiti ma Tonga. O lenei ‘au o le a ulufale i le Super Rugby i le 2021, o le a avea Suva ma nofoaga tumau o le ‘au. O le faamatalaga lea na tuuina mai i le NZ Rugby (NZR) ma le lala o le va-i-fafo a le Malo o NZ poo le Ministry of Foreign Affairs and Trade (MFAT). I se sailiiliga faapitoa (Feasibility Study) mo lenei faamoemoe na faatupeina e le MAFT i le tau e tusa ma le $80,000.00 i lalo o le vaaiga a Jeremy Curragh, ma faamalumalu iai le MAFT ma le NZR, na faataoto mai ai se faaiuga e faapea. O le a avea Suva ma nofoaga autu o le ‘au, ae e iai taaloga e fai i Apia ma Nukualoa, Aukilani ma Sini, Ausetalia.
O le ‘au o le a faatuina ise faiga faapisinisi, o le a ofi atu i le Super Rugby i le 2021. O le taofi o le Malo o NZ e pei ona saunoa iai le Minisita o Taaloga Grant Robertson.
O se tulaga lelei tele le auai o se ‘au a le Pasefika i le Super Rugby, o le a fesoasoani tele lea i le atina’eina o le taaloga i le Pasefika.
Na ia ta’ua foi, “O loo tele le taleni i le Pasefika NZ ma Ausetalia mo le tuufaatasia o lenei faamoemoe. O se tulaga lelei foi mo le Super Rugby i le iai o se ‘au a le Pasefika.” Na faamaonia foi e le Minisita le galulue faatasi ai o le Malo male NZR i lenei tapenaga.
E iai faaletonu na faailoa il e lipoti, e aofia ai le malaga mamao o ‘au mai Aferika i Saute (SA) e taalo i Suva. O le faaletonu e faasino i auala e uia e ‘au mai Aferika e malaga ai i Suva.
I le taimi nei, o le itu sili lea ona faigata mo au a Aferika i Saute, o le malaga lea i Ausetalia ma NZ mo taaloga, ae o le a sili atu ona faigata pe afai o le a faaopoopo iai ma Suva. O le faigata o Suva, ona e le iai ni vaalele e malaga sa’o atu i Nausori, ae tulaueleele uma vaalele tetele i Nadi ona toe pue ai lea o le isi vaalelei i Nausori, faatoa malaga ai i Suva.
O le ala lea ua fautuaina ai le NZR ma le Super Rugby ina ia vaavaai i Nadi e faatuina ai le nofoaga tutotonu mo le ‘au a le Pasefika, aemaise ai o loo iai le Malae fou o loo fausia nei i Nadi o le a talafeagai lelei ma taaloga tetele.
O le isi faaletonu na faalia i le lipoti, o le mautu ma le malosi o se au mai le Pasefika aemaise lava le tulaga tau tupe. I le taimi nei e lua ‘au a Aferika i Saute ua aveesea o le Cheetahs ma le Kings, faapea le Force a Ausetalia ona o le utiuti o le faasoa i le tupe maua, peitai, o lea o le a toe faatu le isi ‘au fou, i le nofoaga e sili atu ona faigata ona maua ai se manuia i le itu tau pisinisi mo le ‘au fou.
O ‘au e lua nei e lua a Aferika ua ulufale atu i le taamilosaga i Europa (Pro 14) ae ole Force a Perth ua latou amataina le isi taamilosaga fou ua faaigoaina o le World Series Rugby o loo aafia ai Samoa, Fiti ma Tonga.
Peitai, o le autu moni lea o le sailiiliga faapitoa sa faia e Curragh, ina ia tilofia ai itu faigata ma ni faafitauli e tulai mai pe a faatino lenei faamoemoe, ma sailia foi ni auala e ono mafai ai ona foia ia faafitauli.
O itu lelei o lenei taumafaiga, o le a le gata ina siitia ai le atinae’ina o le lakapi i le Pasefika, i taaloga faavaomalo, ae ose tulaga foi o le a faaitiitia ai le militino mai o Saina i motu o le Pasefika ae faamuamua pea Niu Sila ma Ausetalia ona militino ma le Pasefika i tulag tau taaloga.
E ova ma le $400 miliona tala NZ le foai a NZ i le Pasefika mai le 2017/18, o le faamoemoe foi a NZ ia avea lenei fesoasoani tele e uunaia ai le tutoatasi o motu o le Pasefika, i ana atina’e e aunoa ma le faalagolago ia Saina e pei ona iai i le taimi nei.
O le mafuaaga foi lea na saili ai e MFAT avanoa e atili atina’e ai tulaga faa-pisinisi mo le Pasefika ma faaaoga ai le taaloga e pele i loto o atunuu nei e tolu. Aemaise ai, e le o iai se manuia o maua e le Pasefika i le taimi nei, i le avea ai o le lakapi ma taalofa faapolofesa.
E talitonu foi le MFAT, o se taumafaiga faapenei, o le a le gata ina manuia ai tama taalo o le a filifilia mo le ‘au, ae faasoa atu ai foi ni faamanuiaga e maua mai i lenei atina’e mo au faaitumalo ma le atina’eina o le lakapi i le pasefika.
I le taimi nei, e le o iai se ioega a le MFAT o le a taulamua i le faatupeina ose ‘au mai le Pasefika, peitai, o lea ua taulamua latou i le sailiiliga faapitoa ina ia mafai ona tali fesili e tulai mai, i le tapenaina ose au tuu faatasi a le Pasefika.
O le faaiuga o lenei sailiiliga faapitoa ua mae’a ona tufaina atu i Iuni Lakapi a Fiti, Tonga ma Samoa. I le taimi nei, e le o mautu se manatu o le Iuni Lakapi a Samoa pe taunuu lenei faamoemoe pe leai foi, ae ua faailoa e Samoa lo latou lagolagoina o lenei atina’e peafai e taunuu.
O le faitau a le Ripoti e ova ma le 700 alii ma tamaitai o le Pasefika o loo taalo i ‘au a le lalolagi i atunuu eseese, poo le faitau lea e 15% o tagata taalo uma o le lalolagi e o mai le Pasefika.
O loo ta’ua i le ripoti lenei, e silia ma le 700 alii ma tamaitai Pasefika o loo taaalo lakapi i isi atunuu o le lalolagi, e tusa lea o le 15% o tagata taaalo lakapi i le lalolagi atoa. O isi galuega o loo faatinoina e le MFAT i le taimi nei mo mea tau taaloga a le Pasefika, e afoiga ai le faatupeina o le Pacific Sports Partnership, e unaia ma faamalosia ai tupulaga Pasefika i le taaloga lakapi ma le netipolo. O loo latou faatupeina foi le Asosi o alii ma tamaitai taaalo ale Pasefika (PIPA) faapea le faatupeina o le malae taalo a Tonga, le Tefuhiva Stadium i Nukualofa.
