I le lamalama faaiu ai o le malama o le itula o le Aso Toonai a o sauniuni atu ai i sauniga o le sapati i le aso e sosoo ai, e pei o le masani lea o aga o le taaloga o le lakapi e taualuga lava i taaloga faaiu o lea aso, ma faamae‘a ai foi lea taaloga o lea aso. Ma o le taaloga la i le va o Saleimoa NZ ma Saleimoa Samoa na taualuga i ai taaloga sa faia i le malae a le kalapu lakapi i Otahuhu i le aoauli o le Aso Toonai na se‘i mavae atu nei.
E foliga mai ua pei o loo faaauauina pea lea sootaga vavalalata o tupulaga o le afioaga e lē gata i Niu Sila nei ae faapea ma Samoa, o loo maitauina le tele o le sao o lenei afioaga i le faafaileleina lea o le taaloga i totonu o Niu Sila nei e ala i le taamilosaga faia pea a Aukilani Samoa i tausaga taitasi.
Ma o le tasi foi lenei o kalapu o loo faamauina i faamaumauga sa siamupini i taaloga o le Aukilani Samoa i nisi o tausaga ua mavae atu, ma o loo tumau pea lea tulaga maualuga e oo mai i lenei talutalu fou.
O le faataunuuina o se taaloga faapea i le va o ‘au a Saleimoa i NZ ma Samoa o loo atagia mai ai le maopoopo ma le tupulaga e mafai foi ona faapea o le fai nuu lelei, aua oloo tumau ai le fealofaniga o tupulaga o le afioaga e tauala lea i taaloga o le lakapi.
O se taaloga o loo fiafia i ai le tupulaga, vaai le taupati atu o le tapuaiga o lenei taaloga i nisi o le afioaga i lea aso ua faatumulia ai le malae ma maimoaina ai le tomai o alo ma fanau o le afioaga.
E tuua le malae i lea aoauli oloo faaauauina pea le ‘afa muamua o le taaloga, tau fai malolosi uma ‘au e lua.
I le vaavaai atu i le taaloga i lea aso e foliga mai e tau matutua atu le ‘au masii mai i Samoa a le afioaga o Saleimoa fua i le talavou o nisi o tupulaga a le afioaga na latou taaalo ai i lea aso, ae o le tala fiafia o le maua i o le fealofaniga i le tupulaga o le afioaga lava ia.
Masalo a alualu ai faapea le faiga lea, e mautu se isi vaaiga faafiafia loto i tamalii ma pulega o le afioaga o Saleimoa i le lumanai e tauala atu i taaloga, atonu o se taiala lelei foi lea ua amata mea ai lenei afioaga auā le maopopoga o tupulaga o se afioaga.
Na vaaia le malolosi o tama taaalo mai Samoa i lea taaloga, i le tau malulu o loo iai Niu Sila nei, manuia le toe taliu atu ai o le faigamalaga i Samoa mai le afioaga i le maea ai o ni fuafuaga e pei ona autovaa mai ai i Niu Sila nei.
