O loo iai pea le popolega i le Ofisa o Leoleo i Otahuhu ona o se tamā matua Samoa ua leva ona lē toe vaaia talu mai Fepuari 2010. O loo faaauau pea le sailia e leoleo o Siafua Faleaupu o se tamā ua 59 ona tausaga. E iloa foi Siafua e nisi i lona igoa valaau o Popi.
O le alii leoleo suesue o Detective Simon Jeffries o loo feagai nei ma lenei mataupu. E faamaonia e Detective Jeffries o le Aso Lulu, aso 17 Fepuari 2010, na gata ai le vaaia o Siafua, i le nofoaga mo tagata matutua o le Christina Rest Home i Massey Road i Magele.
Ua faaalia mai foi i suesuega a Detective Jeffries, o le tamā ia Siafua e tino malosi ae ua amata ona aafia lona mafaufau ma ua galogalo mea.
E masani ona alu mamao ana savaliga ma toe foi mai i le fale.
Ae peitai e iai foi savaliga a Siafua e lipotia mai i lona nofoaga i Magele ina ua lē foi atu ae maua mai i Avondale.
O loo faaalia mai foi i suesuega a leoleo, e iai fesootaiga a Siafua i Wanganui ona sa nofo ai muamua.
O loo talosagaina foi tagata i Wanganui ina ne‘i toe foi i ai ia Siafua. E talosagaina e le Ofisa o Leoleo poo le Otahuhu Police CIB e faafesootai mai le telefoni (09) 259 0671 pe vili fua mai le Crimestoppers i le numera 0800 555 111 pe afai ae silafia e se tasi le mea o loo iai ia Siafua Faleaupu.
