Saili seleni tupu ma tamalii o Faleaseela i Melepone mo le Malu o le Atua

O le Isaraelu e alofa moni, e susue pea lona faamalama ma seu silasila i lona nuu ma aiga.
O le taunuu mai o le tusi talosaga mai le paia o le Ekalesia Katoliko mo le fia faaleleiina o le galuega a le Atua i le afioaga o Faleaseela, na a‘e ai se tofa i tupu ma tamalii o le afioaga aemaise le mafutaga a tamafanau o loo alala ma papaaao i le aai o Melepone, mo se sailiga seleni e ala i se tusigaigoa auā le galuega.
Na mua mea i Matautu Sa i le sauniga na taitaia e se tasi o lupe faalele a le afioaga, le susuga i le faafeagaiga taulagi ia Filipo Taua, mae‘a ona faagasolo ai lea o le aso.
O le Fofoga o le aso o le tofa ia Lilo Simeona ma le taumafataga felanulanuai na tapenaina e le Sei Pua.
Na maitauina le aao mafola o le paia ma le mamalu o Samoa na potopoto, lea na tuufaatasia le seleni ma maua ai le limasefululua afe tala.
O Talo o le vavau Vaafusuaga na fai ma Fofoga o le afioaga e faafetaia le aao mafola o le atunuu, ona o le seleni paia, o ia lava foi lea na malotoga auā le meaalofa mo le mamalu o le valaaulia ma Samoa na agaalofa ma agalelei mo le afioaga.
E pei o la a le tusi, ia toe faatutumu e le Atua mea ua faagaogaoina ona o le silasila i le Atua ma lona finagalo. Faafetai Samoa le aao mafola, faafetai le faaaloalo ma le faaeaea, o le a lē galo lo tou agalelei.