O le Tutoatasi 2015 i Sini o le a sailia ai se ‘Talavou Auro’ (Golden Youth) mo le taimi muamua i totonu o Niu Sa Uelese. Faaalia e le sui o le Komiti, Leilua Jerry Uesele o lenei faamoemoe ua loa ona tau faaofi i polokalame i tausaga ua tuanai peitai sa lē faaaogāina ae o le tausaga nei ua alagatatau le amatalia talu ai le moomia o lenei faamanatu i tupulaga o soifua i Ausetalia.
O le Aso Gafua 8 o Iuni 2015 i le nofoaga o le Whitlam Centre i Liverpool lea o le a faatautaia ai foi faafiafiaga ma faleaiga o lenei tausaga ua fuafua e molimauina ai lea polokalame fou.
E ese mai ai i Siva, Pesepesega ma isi ituaiga faafiafiaga masani o le a faatulaga i lea aso, o le sailiga o se ‘Talavou Auro’ o le faalauiloaina lea o fanau mai le 8 tausaga agai atu i le 18 tausaga e iai le agavaa poo le tomai foi e faitauina le Pi Tautau poo le A ato E elefane mai le vaega valu tausaga. O le aogā o lea itu ia maua ai se avanoa o le fanauiti e tautatala i luma o tagata i lea aso e lē fefefe.
I le vaega laiti lava lenei o le a saili fanau e iloa faatulou ma fai feau Samoa e pei o le fuefue o meaai ma le apa fafano aemaise galuega fesoasoani i mātua. O le isi tausaga matutua atu o le sefulu agai atu i le sefululima o le a saili le tomai i kuka faigofie faasamoa e pei o le faalifu ma le suai‘a ma nisi.
O le vaega 16 agai atu i le 18 o le a faamamafa i ai le sailia o i latou e talenia i lauga ma tiute faafaleupolu. E amata atu lava i Folafola Toonai, Lauga Faafeiloai ma Lauga Faafetai i soo se mafutaga o le a faasinoina i lea aso.
O nisi foi o alagaupu ma muagagana e silafia e le fanau o le a faailoaina ma togi agai i ai a latou folasaga ma lauga i lea aso.
O i latou taitoatasi o le a mau faailoga i nei itu uma o le a tauaaoina i ai nai faailoga tupe laiti ma Fusi o le ‘Talavou Auro 2015’ ma le faamoemoe e toe puipuia i le tauvaga o le tausaga fou. O lenei taumafaiga o le a faalauiloaina (promote) i upega tafailagi ma leitio Samoa i Sini ia faatāuaina ai e fanau le aogā ma le tāua tele o le taofi mau i tu ma aga faasamoa aemaise le measina o le ‘gagana Samoa’. O le mau lea a le leitio FM89.3 le Samoa Sportstar o loo tauave.
I se sailiiliga na faataunuuina i le 2014 i Sini, ua vaaia ai pea le palasi maualalo o le numera o tamaiti Pasefika e tautatala lava ia latou gagana e faatusa atu i fanau Arapi, Asia ma Aferika.
O le faatāuaina ma le faamalosia o lenei polokalame i le tausaga nei ua faailoa e Leilua Jerry Uesele atonu o le amataga lea e toe fafagu ai le mitamita o fanau i lo latou faasinomaga ma toe fiafia ai e tapue le gagana Samoa ma lona uiga i o latou olaga.
