E pei ona faaalia i nisi o a tatou tusitusiga ua tuanai, e lē toatele naua le aofai o le paia ma le mamalu o Samoa o aumau ma nopiai i le aai o Melepone, pe a faatusatusa ma isi aai tetele o le atunuu o Ausetalia e pei o Sini ma Perisipeni e toatele naua le paia lasilasi o papaaao ai.
Ai ona o le mafanafana o le tau i ia aai, o le ala foi lea a faamanuia le Atua i se aiga Samoa ma amata soo se pisinisi aemaise lava o auaunaga tau faleoloa, e fia ni vaiaso faatoa tau alia‘e ma iloa lautele e lo latou lava pitonuu, se‘i vaganā ai le taulogologo a nai tautua leitio. Peitai e lē o mafai foi ona oo le malosi o leitio i tulimanu uma e fa o le aai.
E tofu le tulimanu ma ona leitio, e gata ai lava foi i ona ituvai le malolosi, o le ala lea e fiafia ai la tatou tautua lenei e logo puialii le mamalu atoa o le aai, auā o loo mafai ona faatau la tatou pepa i tulimanu uma o Melepone, ma soo se faleoloa fou e tatalaina, e taumafai lava i se mafai e vave oo i ai la tatou pepa.
O le vaiaso na tea nei na tatala aloaia ai se tasi o tautua faleoloa i le pitonuu o Granbourne, lea ua tautua mai ai le susuga ia Peo Moreli ma le faletua ia Mariana Moreli ma nai o la alo. E maua soo se taumafa Samoa, maua foi taumafa vela, tele CD ma DVD faapea lavalava.
O lenei tautua fou e tatala mai le Aso Gafua e oo i le Aso Toonai mai le 7 i le taeao seia paia le 6 i le afiafi. Mo le silafia atili i lenei tautua fou mo si o tatou atunuu, e mafai ona faafesootai le Morelis Enterprises i le 55954734, ma e feiloai atu ai i nisi o tamaitai o loo i le ata foi lea o le toe foi le tama Savaii. Faafetai le tautua atunuu ma ia faalautele e le Atua lo outou valaauina.
