E lē o manino mai poo le ā le tulaga e oo i ai ia avanoa faigaluega pe a lē toe filifilia nei alii i le Manu Samoa pe lē toe taaalo lakapi foi
Ua atoa nei le vaiaso talu ona amata Simaika Mikaele, Alafoti Faosiliva ma Lolo Lui i le Matagaluega o le Soifua Maloloina.
O ni avanoa faigaluega tumau ia ua maua e nei alii ma na ta‘ua e le Ofisa o le Iuni Lakapi a Samoa i Malifa, e ta‘i $30,000 i le tausaga le totogi ua ofo atu mo nei alii.
O le toatolu muamua ia ua maua avanoa faigaluega faapea ona o le talosaga a le Iuni lakapi a le atunuu i Matagaluega ma Faalapotopotoga a le Malo ina ia iai ni avanoa faigaluega mo nei alii.
O le Matagaluega la o le Soifua Maloloina lea ua muamua tali ane i ia talosaga ma o avanoa faigaluega nei o le a faaaogā ai nei alii e le vaega a le Matagaluega o loo nafa ma galuega faalauiloa.
O le a o atu i afioaga i tua mo polokalame faaleaoaoga ma polokalame faalauiloa a le Matagaluega.
E le gata i lea o le a faaaogā nei alii i luga o televise leitio faapea ai nusipepa auā le faalauiloa ai o taumafaiga a le Matagaluega i le unaiga o le Soifua Maloloina.
“E faafetai lava i lea Matagaluega a le Malo, auā o le talosaga na mafua ona faia ona o le tele o nei alii e lē mafai ona galulue tumau i ni ofisa poo ni kamupani ma pisinisi talu ai o le tele o le latou taimi o loo ave i toleniga i le lakapi,” o se faamatalaga lea a le Ofisa Sili o le Iuni Lakapi a Samoa, le Afioga Su‘a Peter Schuster.
Ta‘ua e Su‘a o aso uma lava mai i le Aso Gafua seia oo i le Aso Toonai e faalua ona toleni sui o le Manu Samoa i le aso.
E amata i le fitu i le taeao toleniga ona mae‘a lea ae malolo tama seia oo foi i le tolu i le afiafi ona toe amata foi lea o toleniga ma o le tele lava o le taimi ua ave i sauniuniga a nei alii mo le taaloga lakapi.
“Ae o le tele o le taimi lea o loo toleni ai e leai se tupe e maua e nai tama. Se‘i vaganā lava ua malaga pe ua filifili foi i aufili a le atunuu ona maua lea o se alauni, ae o le taimi atoa lea e iai i Samoa o loo toleni, e leai se tupe e tausi ai o latou aiga,” o se saunoaga lea a Su‘a.
“O le mafuaaga lava lea o le tau saili o ni avanoa e mafai ai ona maua se seleni e tausi ai aiga o nai tama ae ave lo latou taimi lea auā toleniga mo taaloga lakapi faavaomalo, e lē o se mea faigofie foi le taumafai ai ina ia filifili pea i taaloga faavaomalo”.
O nisi o Faalapotopotoga poo Ofisa o le Malo ua faaali ane lo latou sauni e faafaigaluega isi sui o le Manu Samoa e lē o iai ni galuega ua aofia ai le Pulega o Uafu ma Taulaga, Pulega o le Suavai ma le Pulega o Malaevaalele.
“O lea lava e tau faatali atu le faatinoga o konekarate o le a faafaigaluega ai e ofisa nei ia alii ma o se tulaga lelei tele lea pe a mautu galuega mo nai tama ae maua pea ma le avanoa e taaalo ma toleni ai”.
Faaalia e Su‘a o nisi o aiaiga o le faafaigaluega ai o nei alii i ia konekarate ua maua, e tatala ai lava le avanoa e o ese ai nei alii mai ia latou galuega ae toleni i aso uma.
Ua faapea foi ona faataga ai e malaga i taamilosaga o le lakapi i le tausaga atoa a o feagai ai ma taaloga nei. E lē o manino mai la poo le ā le tulaga e oo i ai ia avanoa faigaluega pe afai e lē toe filifilia nei alii i le Manu Samoa pe afai foi e lē toe taaalo lakapi.
O loo tālia nei la avanoa faigaluega mo isi alii o le Manu Samoa ma e fuafua lava le taimi e amata ai i le faamautu ai o konekarate mo i latou.
Mo le toatolu ua amata nei i le Matagaluega o le Soifua Maloloina – ua vaaia le usuai atu i aso uma auā le taumafaiga ina ia faamalieina konekarate nei ua faamautu mo i latou.
