A fiafia ma mataalia le tamaititi i lona faaalia o ana gaioiga ma le faatinoga o lona auai i totonu o a‘oa‘oga, o lona uiga o loo ola saogalemu ma maloloina lelei mai ma‘i ma faafitauli e ono lamatia ai le ola, auā o loo lelei ona tapueina ma puipuia e ala i le fesoasoani ma le lagolago malosi a mātua, aiga, faiaoga ma tagata lautele i le tausia lelei o vaega uma e tatau mo le ola maloloina lelei o fanau o le lumanai.
E lē uma auaunaga faaauau pea a lala ma faalapotopotoga a le matagaluega o le soifua maloloina e ala i le faatinoina pea o lo latou faanaunautaiga ina ia faalauiloa atili pea lava pea la latou anavatau tauave o le ola soifua maloloina lelei o tagata uma e afua mai, e faamamafa ma faapitoa lava mo alo ma fanau laiti i totonu o aiga ma Aoga Amata.
O le isi lenei polokalame e matuā talitonuina ma lagolagoina malosi e Aoga Amata ona o le tele o lo latou sao, i le galuega soosootau‘au ma faiaoga e faamautu atili ai le logopuialiiina o mātua i le tāua tele o le faataunuuina o tui puipuia o fanau a o lei agai atu i aoga tulagalua.
E matuai alagatatau lava le ave o le faamalo ma le agaga faafetai tele i le faalapotopotoga a le ofisa mamalu o le Health Star Pacific Trust, ona o lenei lava polokalame faaauau i tausaga uma ua fai pea ma faamanatu ma auala o le taulogologo atu ma a‘oa‘oina ai mātua ma faiaoga i le tāua tele ma le tatau ona tausia fuafuaga ma faataitaiga ua faasafua mai e le aufaigaluega ma le ofisa o le soifua maloloina, auā lava le tausia lelei pea o le ola tuputupu a‘e o fanau lalovaoa o si o tatou atunuu ma le Pasefika.
O se vaaiga foi na maofa ai, ma lagona ai le faagaeetia ona o le faatupulaia pea o le fuainumera o Aoga Amata, latou te lagolagoina ma faatāua le faatinoga o le faamanatuina o lenei aso sili ona tāua mo le fanau laiti aemaise foi o mātua. Auā i lea aso sa faafiafia lava le fanau ia latou aitema sa faatonuina mai e le ofisa, ia ae na faapena foi ona alo atu mātua i le maitauina o faaaoaoaga na saunia lelei e le afioga i le tamaitai o Tai Faalogo ma lona soatau o Victor.
O nei faaaoaoga sa matuā faasoa mai ai le aufaigaluega (Tai ma Victor) mai le Auckland Regional Public Health Service, e faasino le gaosiga ma le faiga o meaai talafeagai ma paleni lelei (healthy lunches) mo fanau uma mo lea aso ma lea aso. Ia e lei alo tamala lava fanau uma mai aoga amata eseese o le Pasefika i le faatinoga o tauloto, siva, pese ma haka na momoli mai ai le tele o feau tāua mo le tausia pea o le ola maloloina e ala i le taumafaina o fualaau‘aina i aso uma.
