O le tina ia Tuluvao Tausa Futi, o se tasi lenei o tina matua mai le matagaluega ale Ekalesia Metotisi i Otara ua toaluasefulu iai tina sa tauaaoina a latou pine auro mai le fonotaga a le Auso Fealofani a le Ekalesia Metotisi Samoa lea sa usuia ia Iulai ile tausaga lenei 2016 a‘o lei usuia le Koneferenisi poo le fonotele a le Eakesia aoao ale lalolagi.
O le masani a le Ekalesia e tauaaoina pine faapitoa mo tina uma o le Ekalesia ua atoa le ta‘i 80 tausaga o o latou soifua, ma o se faailoga poo le faamalo e tali atu ai ile latou tautua punouai ma le matavela i totonu o lotu a le Ekalesia Metotisi, ma e faapitoa lava na o tina pe a oo ile usugafono a le Auso Fealofani.
O le afioga ile Peresetene aoao o le Ekalesia Metotisi ia Rev Apineru Lafai sa tauaaoina nei faailoga i Samoa ile laumua i Fogaa i Faleula ile nofoaga masani.
Ma o se faaeaea tele foi lea a le Ekalesia mo nei tina ona o galuega lelei oloo latou faia, ma ose tulaga maualuga lea ua tali fiafia ai e le tina ia Tuluvao Tausa Futi le faaaloalo maualuga ale Ekalesia.
Ma ose luitau ma le faamalosi foi lea oloo fafagu pea e lenei tina i totonu o lona aiga ile onosai ma le faamaoni ile tautuaina o le galuega ale Atua.
O le nofo tatalo ma faamanuiaga a mātua o lea ua sapi ai lenei tina ma lona aiga, e pei ona saunoa Tuluvao Tausa Futi, o lona soifuaga atoa na tuputupu a‘e ai, o le Ekalesia Metotisi, e pei ona lolotu ai ma ona mātua ma lona aiga i Safotu ile Meotisi, na aoga foi ile aoga a le Avoka i Upolu i Faleula seia oo lava ina malaga i Tutuila ma nofo ai ma lotu ai i lea Ekalesia i Fagatogo.
Na malaga mai i Niu Sila ma galulue ma lona toalua ia Onosai Futi ile Ekalesia Metotisi palagi i Grey Lynn a‘o vaai le lotu e le susuga ile aoao mai Piula ia Tupe Timoteo.
Na aluai aluai le lotu palagi i lea vaitaimi ona vaavaai lea o latou ua toatele tagata Samoa ua lolotu, ae ua iai foi le manaoga o tagata lolotu i lea vaitaimi ua fia manaomia se lotu Samoa e faaaogā ai le gagana Samoa. Ma o lea sa latou faavaeina ai loa le lotu Metotisi Samoa i Grey Lynn seia oo mai lava ile taimi nei, faatasi ai ma le malumalu oloo i Grey Lynn oloo faaaogāina lava i tapuaiga. O se tina e faamaoni i ona tiute fai i totonu o le Ekalesia Metotisi ma e fiafia foi e fautua mo le galuega ale Atua, aemaise lava ile pito laau a tina e pei o le Auso Fealofani, ua tele foi ekalesia ua faatuina i totonu o Niu Sila sa fofoa mai ile Ekalesia Metotisi lenei i Grey Lynn, aemaise ai o le tele o agaga sa faafaileleina mai e le tina ia Tuluvao Tausa Futi i totonu o le Metotisi Samoa.
Oloo faaauau pea lana galuega lelei i tagata matutua i totonu o le Ekalesia o le fautua mo le galuega ale Atua i Otara.
