Faamalo atu Samoa i lau faitau i lenei foi vaiaso. Faafetai i le Atua ona o lenei foi ua maua le avanoa e feiloai ai pea i luga o le tautua atu a le Samoa Times e pei ona iai i vaiaso taitasi.
E maualuga le talitonuga o loo sologa manuia pea le sa o le folauga e pei ona folau ai si o tatou atunuu i le alofa ma le agalelei a lo tatou Tapaau Sili o i le lagi. Malo lava le tauatai, malo foi le soifua manuia.
O lenei vaiaso ua manatu le Tusitala ina ia faaulutala se lagona e faapea, “E malu le tamalii Samoa i ou aao ma ou lima”.
Ua le o toe po se lilo i le tulaga e pei ona iai nei le iuga o le faamasinoga a le afioga Taito Phillip Field.
O lenei iuga ua momoli mai ai i finagalo ma loto o le toatele le tele ma le anoanoai o le mau fesili, ma fesiligia ai le faamaoni e pei ona sa feagai ai ma sui faatonu o le faamasinoga e pei ona o latou aumaia ai le faamaonia o moliaga e 26 e pei ona sa molia ai le afioga Taito.
O nisi o fesili e pei ona fesiligia e le toatele, o le faamatalaina lea o le tulaga e uiga i le aganuu a Samoa o le “Lafo” pe na atoatoa ona auiliili.
E le gata foi i lea, ae o le a se vaai a le tulafono o le Malo Niu Sila i le faatinoina o lea foi vaega taua o le aganuu a Samoa i totonu o eleele o lenei foi atunuu.
O nisi ua latou fesiligia le vave ona aumai o le faaiuga pe a fua atu i le taimi na uma ai ona tali atu le afioga Taito e tusa ai ma fesili a le loia a le itu tagi e pei ona faamaea ai i le lua vaiaso talu ai.
Ou te leiloa pe o fea o taoto ai lou finagalo ma lou faamoemoe a o faagasolo mai lenei mataupu.
Na pau le lagona o le Tusitala o le misialofa lea i le tulaga ua iu i ai sailiiliga a le faamasinoga e ui ina e oo foi i le Tusitala o loo iai foi ni vaega o loo ia fesiligia ai lenei iuga.
O lea ua talia nei se finagalo a le faamasino pe o le a se iuga o le a tuuina mai, ae o le manatu o le Tusitala pe o le a faatali ai ea ma Samoa e aunoa ma se tali atu.
O le gaioiga sa faia e Maori lea sa o latou savalia ai le fale faamasino ma faaalia le latou lagolago i le afioga Taito, o se luitau tele lea pe a matua mafaufau i ai ma le totoa.
O se luitau ona o lenei lava ua faaalia le valevale alofa a tagata o nuu ese sei tulou tagata Maori, ae o le fesili pe o fea ea o iai tatou. Ua toe tu mai i manatu le tagi a le tina ia Taputuitagitele ona o si ana tama o Faatuliaupolu.
“Faatuliaupolu e, fai mai foi o oe o le tama a Nuuuli ma Faleafa, ae ua fasia lava oe a o fea o iai Tuato ma Tolovaa.
Fai mai foi o oe o le tama a Malaeola ma Gafoaga, ae ua fasia lava oe a o fea o iai Vaifale ma Tevaga”.
E pei e tau agai se lagona i le itu lea, ona e foliga mai o lea lava ua fasia i o tatou luma sia foi tamalii o si o tatou atunuu, ae o fea ea tatou?
O le fesili, o le a so tatou sao e faailoa ai lo tatou tali atu i le iuga ua tuuina mai? Sa luitauina le Tusitala e se tasi o tulafale ua iloga foi lona sao i nai o tatou tagata i totonu o Niu Sila nei.
O lana fetalaiga ina ua valaau mai i le telefoni, e fia oo atu sei feiloai i le afioga Taito ma fai se la tala.
Ae ina ua uma ona o la feiloai, ona toe valaau mai lea ma faapea mai, o loo avanoa i soo se vaega e moomia ai lana fesoasoani a o tali tali le faaiuga mo se faasalaga mai le Faamasino.
E tasi le aso e va ai ae pine lea luitau i se saunoaga a se tasi o tina i le maketi i Magele ina ua ia fai mai i le Tusitala, o le a ea se mea e tatau ona tatou faia mo Taito? Sa ou alu lava ma mafaufau totoa i ai pe aisea lava ua pulunaunau mai ai ia foi tamalii i se mea e ao ona fai.
Ona toe faafoi lea o manatu o le Tusitala i le soifua galue o lenei foi tamalii i totonu o Niu Sila i ona upufai, ae le gata i lea o lona sao i le tele o fesoasoani sa ia ofoina atu mo soo se tagata na sulu atu i lona ofisa. Pe ai ona o lea le itu, ua mafua ai ona manatu nisi e tatau ona taui le alofa i le alofa.
Ae a faapefea le talafaasolopito sa tusia ma o loo matamata tetele pea i totonu o Niu Sila, o le uluai tama fanau a le Pasefika, ma o ia foi o se uluai Samoa na soifua mai i Samoa na muai ulufale atu i le Palemene a le Malo Niu Sila.
E le faapea la o ni viiga o le afioga Taito, ae lea sa sii ai Samoa e pei o le fale o Asomua i luga o le mauga.
O le fesili foi lea o loo nofo pea ma le Tusitala. O le a ea se mea e ao ina fai e tali atu ai i le iuga e pei ona tuuina mai? Samoa le atunuu pele, nei iai lava se tasi e tusi tusi lima ma lagolagoina le iuga ua tuuina mai i se taimi vave e aunoa ma le toe nofo i lalo ma mafaufau totoa i ai, ona lagona ai lea o le faanoanoa.
E le aia se manatu vaivai i le aai o finagalo, ae o le Peni a le Tusitala, ia alofagia le tamalii Samoa ua feagai ma luitau tetele ona o lana molimau ma lana mau faaauau, sa alofa, ma sa fesoasoani i lona agaga mama i tagata uma o e sa moomia lana fesoasoani ma lana faamama avega.
E moomia lau tatalo Samoa, atoa ai ma le galulue faatasi ina ia malu le tamalii Samoa i ou aao ma ou lima.
E malu faapefea? E malu i lau lagolago ma lou tulai mai.
E malu i lau tatalo ma lau tapuaiga. O le tapuaiga saili ma le agaga o le matua faitama.
Fai mai le isi alii, ua tatau ona faia se tatou savali e faailoa ai le lagolago ia Taito.
O le tali, e leai se tuaoi o mea lelei. Magele, o fea ea la outou titi faitama, o fea o iai le vaipuna sa utuvai i ai le galala i tausaga e tele.
Samoa e, aua nei punitia faatai nenefu le tofa ma le faautautaga, ae tulai mai ina ia tau so tatou sao, ina ia malu le tamalii Samoa i o‘u lima ma tou aao.
Ia manuia lenei vaiaso
