O le a lē faalauiloaina suafa o i latou o loo aafia i lenei tala ona o ni manumanuga ma puipuiga i tulaga tau i le galuega, ae o se mataupu sa faaoo mai i le ofisa o le Samoa Times ma le faamoemoe ina ia faalauiloa atu ona o nisi o vaega tāua e tatau ona silasila toto‘a i ai le Ekalesia ma le Faafeagaiga auā le faia o faaiuga sa‘o ma le talafeagai e tusa ai ma le faavae o le EFKS e pei ona iai.
O le afioga i le tiakono o se tasi o Ekalesia EFKS o loo faatinoina a latou sauniga i se tasi o falesa palagi i totonu o Otahuhu, o ia lea na oo mai ma momoli mai lenei mataupu mo le faasalalauina.
O ia foi lea ua faamalolo ona tofi mo le 3 masina, talu ai o ia sa tulai mai ai le vevesi ma le susuga i le Aoao Fesoasoani o le aulotu i le amataga o le masina ua tuanai atu nei.
O lenei faafitauli sa taoto mai mo se tali, peitai o le foi mai o le susuga i le faafeagaiga o le aulotu mai Samoa sa faatasi atu i nisi o faamoemoega o le Galuega i Malua sa faapea ona aumai ai loa lana faaiuga ma faamalolo ai le susuga i le Aoao Fesoasoani faapea ma le afioga i le Tiakono poo lē sa avea ma failautusi o le aulotu mo le tai 3 masina.
O le Tiakono na oo mai i le ofisa o le Samoa Times, o ia lea sa avea ma failautusi a le Ekalesia, e faapea sana faamatalaga o le latou lotu o le faamanatuga o le masina o Aokuso sa tulai mai ai se vevesi i lo la va ma le susuga i le Aoao Fesoasoani.
O le Aso Sa lea sa iai se latou tofi ma o le maea ai o le latou toonai na lafo ai e le susuga i le Aoao Fesoasoani ni upu masoā ia poo le paulauvale foi i ni upu matuia e leai se isi e fia faalogo i ai. E le gata i lea, ae sa ia faatinoina foi ni gaioiga lē taupulea e ala lea i le tatuiina i luga o ona limatusi se‘i vaeane le mamalu o le aufaitau.
O nei aga sa ta‘ua e le tiakono i le feiloaiga ma le Samoa Times, e foliga mai o ni tu faapalopalo ma le taulu‘ilu‘i peitai sa onosai pea i ai. Ae ina ua savali mai le susuga i le Aoao Fesoasoani ma lu‘i ia ina ia o la fufusu, o iina loa na lē mafai ai loa ona tatali le tiga o lona loto ma oo ai loa ina o la fepaiai. Ae e lē fou le mataupu e pei ona sa ta‘ua e le Aoao Fesoasoani.
Na ia ta‘ua, e foliga mai e tele lava ni mea o loo tiga ai le Aoao Fesoasoani ia te ia ae sa lē faamaoni e talanoa ane, lea la ua oono oono oo loa ina faapa mai i fafo lona lē malie ma tutupu mai ai ma nei vesiga.
Na ia faaalia o se tasi o vaega o loo faapea ona ia tau tomanatu ai o le taimi lea sa avea ai le Aoao Fesoasoani ma teutupe o le Ekalesia. Sa fai le latou faamoemoe saili tupe i le masina o Oketopa o le tausaga ua tea, peitai e uma ane lava le masina e lei teuina tupe a le aulotu. Na sosoo ai loa ma lona lagaina o le tala o le tupe ona o le a uma lava Novema e lei faia lava se tala o le tupe.
O le tala la lea o le tupe na maua ai e na o le $5000.00 ua uma ona teu, ae lē iloa poo fea o iai le isi vaega tele o le tupe na maua i le latou tusigaigoa e silia ma le luasefulu ma ona tupu afe sa mafai ona tuufaatasia.
Na ta‘ua e le Tiakono, o ia lava na toe taofia le tala o le tupe ma ia fai sa‘o loa i le Teutupe poo le susuga i le Aoao Fesoasoani ina ia toe tapena le tala o le tupe ma ia fai ane ua uma ona teu i totonu le tupe atoa na maua i le sailiga tupe sa fai.
E pei o nisi ia o vaega sa tau tomanatu i ai le afioga i le Tiakono na mafua ai le lē fiafia o le Aoao Fesoasoani e pei ona afua ai ona o la vevesi. Ae ina ua tuanai le Aso Sa na tupu mai ai lenei feeseeseaiga, na tusia ai loa e le Tiakono poo lē sa avea ma failautusi o le lotu ia se tusi ma tuuina atu i le susuga a le faifeau ae faapea ona tuuina atu nisi o kopi i le Toeaina o le Pulega ma le Failautusi o le Pulega.
O lea tusi sa faailoa atu i ai nei tu ma aga lē manuia e pei ona sa faia e le Aoao Fesoasoani ma faatagi ai loa nisi o le Ekalesia sa o latou sainia lenei tusi ona ua iai le talitonuga, ua le tatau ona toe agavaa se tagata faapea ona avea ma Aoao Fesoasoani.
Sa faatalia se tali mai i le susuga i le faafeagaiga ma le manatu o le faavae o le Ekalesia o mataupu faapenei e fai i ai le filifiliga a le aulotu ma o latou soalaupuleina ai se faaiuga, peitai ina ua taliu mai le susuga i le faifeau mai Samoa, na faateia ai le Ekalesia ina ua aumai le faaiuga i le Aso Sa na tea nei, ma faamalolo ai le susuga i le Aoao Fesoasoani mai ona tofiga i le 3 masina, faapea ai foi ma le afioga i le Tiakono poo le failautusi a le aulotu.
Na faaalia e le Tiakono poo le failautusi i le Samoa Times, e lē afaina pe ana faapea o se faaiuga lenei na iu i ai le faiga filifiliga a le aulotu e pei ona taoto ai le faavae o le Ekalesia i mataupu toatuga faapenei. Peitai ua fai lava le faaiuga a le susuga i le Faifeau ma ua lē ogatusa ma le faavae a le Ekalesia.
O le itu o loo tulituli e le Tiakono poo le failautusi ma le toatele o aiga lolotu o le aulotu, o se iuga o le tusi sa tuuina atu i le susuga i le faifeau ona ua oia le lotoifale o le galuega a le Atua talu ai le Aoao Fesoasoani amio lē taupulea.
O nisi foi o aiga ua lē toe agai atu i le lotu talu ai lo latou lē fiafia i lana susuga. O le isi foi itu na mafua ai ona a‘e se tofa i aiga e pei ona saini i le tusi na tuuina atu i le susuga i le Faifeau, ona o le galuega o loo agai i luma. E tatau ona fua se tapu o amioga a Aoao Fesoasoani ona o i latou ia o loo ave i ai le faaaloalo talu ai e leai lava se eseesega o i latou ma faifeau.
O latou foi o loo latou laugaina le Upu a le Atua, o latou foi o loo tausia ma vaaia le galuega pe a toesea le Auauna a le Alii ma le tele lava o isi vala o le galuega o loo faaaogāina ai lo latou soifua. Afai la e lē faia se faiga ma faataoto se alafua e savavali ai Aoao Fesoasoani, o lona uiga e agai mai foi nisi Aoao Fesoasoani e ui lava i le ala lea e tasi, ia pe sili atu foi ona lē manuia ni a latou faiga.
O le upu a le Tiakono e pei ona oo mai i le Samoa Times, o le a lē mafai ona maua se maopoopoga ma le lelei o le Ekalesia pe afai ae le soalaupuleina i ala o le amiotonu tulaga e pei ona iai lo latou va ma le Aoao Fesoasoani. Na ia ta‘ua foi, e lē fou le amio a lenei tamalii.
Na pisa muamua foi ma nisi o aiga a o lei avea ma Aoao Fesoasoani, peitai o lenei ua pale mai i le tofi ae ua atili ai ona lē faaaogāina lelei lona mafaufau.
Na ta‘ua foi e le Tiakono, e lē afaina lona faasalaga ua tuuina atu e le susuga i le Faafeagaiga. E na te taliaina lava ma lona loto maualalo e ui lava e lē o ia lea na usu i le faafitauli e pei ona tulai mai. E ui i lea ae o le a ia onosai pea i ai. Na pau lava lea o le mea e lē o sa‘o i lona talitonuga, ua fai le faaiuga ia laua ma le Aoao Fesoasoani e le susuga i le Faifeau ae ua lē uia ala o le faavae o le Ekalesia, e ala lea i le faia o le filifiliga ona faatalanoa ai lea o lenei mataupu ma fai ai loa se faaiuga.
Na taumafai atu se faatalanoaga i le susuga i le Faifeau o le Ekalesia mo sona finagalo a o tuufaatasia lenei lipoti peitai e lei manuia ona sa tali mai le masini i lana telefoni feaveai.
