O le osofaia ai o isi atunuu o le lalolagi i afā ma mafuie e pei o Vanuatu ma Nepal ma faaleagaina ai le siosiomaga o loo maua ai meaai ma vaiinu aemaise ai ua faaleaga fale ma mea o loo nonofo ai, ua tupu a‘e ai se lagona ou te fia foai mo o‘u uso a tagata e tusa ma lo latou manaoga o loo ua iai i le taimi nei.
O le faalapotopotoga o le Public Affairs o le Tamaki Stake na latou faatinoina se galuega alofa ma se fesoasoani i le afiafi o le Aso Faraile ua mavae, ma latou foaiina ni ieafu mafanafana e 130 ma apa meaai e tauala atu i le Red Cross ma le Salvation Army mo atunuu sa afatia i afā ma mafuie ae faapea foi i tagata o Niu Sila o loo fia maua foi ni meaai ma vaiinu.
O lenei galuega lelei poo le Samaria alofa, sa galulue faatasi ai Ualota e fitu o lenei Stake ma faatinoina ai lenei faamoemoe. O le faletua ia Kinereta Faleiva Tofa o loo taitaia lenei faalapotopotoga i lalo o le faamalu a le Peresetene o le Stake ia Faaetete Lavea, faatasi ai ma fesoasoani a le susuga ia Ofa Pahulu ma Lemoni Vaivai.
Na auai sui e toalua o le Salvation Army ia Raewyn Butler ma Pam Hughes, a o le Red Cross o Amender Aye ma Lisa Walter. O le malumalu o le Ekalesia Iesu Keriso o le Aupaia o Aso e Gata ai i Dawson na feilaoi ai le Stake a Tamaki ma sui o nei faalapotopotoga ma faia ai loa le taumafataga, ona see atu loa lea i le malumalu o le Ekalesia Iesu Keriso o le Aupaia o Aso e Gata ai i Tamaki ma tuu aloaia ai loa nei fesoasoani mo i latou ua tatau i ai le fesoasoani.
O le susuga ia Tofa Falaoa Tofatitautali sa fai ma fofoga o le aso, ae o le faletua ia Kinereta Faleiva Tofa sa fai ma sui o le Tamaki Stake na te tuuina aloaia nei meaalofa i sui o le Red Cross ma le Salvation Army.
Na faaalia le agaga fiafia o sui o nei faalapotopotoga e pei ona faaleo ai le faafetai e le faletua ia Amender Aye o le Red Cross ma na ia faailoa ai e alu sa‘o lava lenei foai mo atunuu o loo ua patino i ai lenei alofa, ae faapea foi ia Raewyn Butler ma Pam Hughes o sui o le Salvation Army.
O le taimi muamua lenei ua faatinoina ai lenei galuega fesoasoani, ma ua iai le faamoemoe o le a faaauauina pea lenei alofa i tausaga uma. E fitu masina sa su‘iina ai e tina o Ualota taitasi nei ieafu mafanafana auā o a latou mea taulima lava nei o loo faatinoina.
O se foai ua faia ma le loto fuatia ifo ma le alofa mo nei atunuu ua mafatia, ae o se avanoa lelei foi ua faailoa ai le loto alofa mo i latou, ua lē gata i atunuu i fafo ae faapea foi i tagata i Niu Sila nei.
