O Pepe Toma e na o le 23 tausaga le matua ae ua maliu i se faalavelave o loo tau saili lava e leoleo pe aisea ua tulai mai ai.
O le po o le Aso Toonai na tea nei na tafafao ai lenei alii ma tamaiti lava o le afioaga i luma ane o le Paselika le lotoā o le Ekalesia Katoliko i Leulumoega.
O se tama na ta‘ua e ona mātua e na ole pau lava lea o le nofoaga e tafao ai pe a oo i le po ma ana uo. E lē tagofia le tapaa e lē inu‘ava foi ae e fiafia e agai ane ma le tupulaga o le nuu ma eva ai i faitotoa tele o le Paselika.
O le faamatalaga a nisi o le tupulaga na tafafao i le po na tulai mai ai le faalavelave lenei, a o nofonofo ai ma Toma ae agai atu se isi alii o se tama talavou o le nuu e lē tafao atu lava i evaga a le tupulaga.
E lei leva ona faafoi mai i Niu Sila ona o ona aafiaga ma ni kegi a tupulaga i Niu Sila. Na agai ane lea alii e suafa ia Sean ma valaau ane le igoa o Toma ae fai ane i ai lea alii e alu atu i le itu o loo iai ma le tupulaga latou te tafafao ai. Na faaauau Sean ma e lei alu ane i le nofoaga o loo iai Toma ma ana uo.
Faaalia e le tupulaga e lei leva ona faaauau a latou tafaoga ae tatagi le telefoni a Toma ma alu ese loa mai i le potopotoga a le tupulaga. O se taimi mulimuli ane na faaalia ai e le tupulaga le faateia ina ua tifa atu Toma ma faapea ane o ia ua lavea ma o le alii lea na valaau ane o Sean lea ua tui o ia i se agaese ma na vaaia e le tupulaga le palapala ua sau i le fatafata o lea alii na ia taumafai foi e ta‘u ane o lea na fai mai tuliga ma lē na osofaia o ia peitai ua vaivai tele.
Na agai ane loa le tupulaga ua taumafai e tuliloa le alii lenei ua tuua‘ia i le osofaiga ae o le isi vaega ua taumafai e ave Toma i le falemai a Leulumoega o loo lata ane. E lei manuia taumafaiga e faaola le alii talavou lenei ona na maliu ai lava i manu‘a o lona fatafata.
Ua taofia e leoleo le alii lea ua tuua‘ia i le faaoo o le oti ia Toma ae o le faamatalaga a mātua o lea alii talavou ua faamagalo i le alii na faapea ona faia lenei solitulafono i le la tama ma e ui i le tiga ua feagai ma le aiga, ae ua mae‘a foi ona fautuaina e aua lava ne‘i toe tulai mai se isi pisa i le maliu ai o le atalii.
E lē iloa lava la pe aisea ua faia ai e lenei alii lea osofaiga ma e oo foi i le tupulaga talavou e lē iloa pe na iai se feeseeseaiga i le va o nei taulelea ua mafua ai lea osofaiga.
