O le fafine o le nuu na ia faia tala o le tamaloa faiava e lē o le tamā lea o le pepe a lona toalua o loo ma‘ito. O le tama o Semu Tautai Alaovae sa agai i lana faatoaga i le taeao o le aso 29 o Aukuso o le tausaga nei 2015.
O le taimi o loo iai Semu i le faatoaga ae tulai mai loa se vevesi i lona atalii faaletulafono poo lana faiava ma se tasi o tina o le latou nuu. Na mafua le vevesi ina ua alu le faiava a Semu i le tina lea ma faamasino ma suesue pe aisea ua ia faasalalau ai ni tala i tagata o le latou nuu e faapea e lē o sana pepe le ma‘ito o lona toalua.
Na taumafai le atalii o lē na aafia i ni manu‘a i le mataupu lenei e vaovao le tauga upu peitai na iu ina fufusu ai ma le faiava a Semu. Na alu ane lē na aafia ua la fasi toalua le faiava a Semu o se tamā ua 59 tausaga o le soifua.
E foi ane le tamā mai lana faatoaga ma ia iloa ane ai le vevesi ma faapea ona televave atu loa ma sasau lana sapelu ma lavea ai le patua o lē na aafia. Na vaai ane le fafine le toalua o lē na aafia (victim) o mea masei mea ma momo‘e ane loa ma tu‘i mai le muliulu o Semu i se maa ina ia mamulu ese ai le sapelu o loo ia faaaogāina. E lei mamulu ese le agaese ae na togi atu e Semu i le fafine. Na tali mai e le fafine le sapelu i lona lima ma faapena ona lavea ai. O le vevesi lenei na mafai ona vavao ina ua laga ane le aiga o Semu ma faafilemu.
Na avatu lē na aafia i le falemai ma iloa ai le tuga tele o ni manu‘a i lona ulu mai le agaese. Na oo le vevesi i leoleo i Lalomanu ma faia ai loa suesuega ma molia ai loa Semu i lona taumafai e faaoo le maliu i se tagata ma lona umia o se aupega matautia o le agaese (sapelu). Ina ua valaau moliaga o Semu sa faapea ona ia ioeina, peitai sa ave le avanoa e le faamasino e saili ai sana loia. Ina ua toe valaau le moliaga na tulai le alii loia o Te‘o Risati ma ia faailoa o ia o le loia a Semu ma ua talosagaina le toe faaui i tua o le tali ioe a lē ua molia ae suia i le tetee.
Peitai sa lē talia e le faamasinoga le talosaga ina ua silasila le faamasinoga ua talafeagai le ioega na tuuina atu muamua. O le faasalaga ua faia e le faamasinoga e tusa o moliaga o Semu Tautai ua faasala ai i le falepuipui mo le 5 tausaga ma le 11 masina. O masina sa nofo taofia ai i le vaaiga a leoleo o le a toesea mai ai.
