O le sauniga o le taeao o le Aso Sa na faapaia ai e le sui o le Board o le ekalesia Uesiliana Metotisi a Ausetalia le susuga ia Rev Evile Pule (Malaemalu Falealili) ma le faletua ia Taumuli Pule (Saanapu & Falepuna). O le faatautaia o lea sauniga o le oo mai aloaia e avea ma faifeau a Forest Lake i le tusi tofiga ekalesia Uesiliana Metotisi Ausetalia.
O le osiga feagaiga foi lea a le faifeau ma le faletua faapea le ekalesia. O le tamaitai faifeau ia Ps Sitika Lemana Satui sa tausia le ekalesia lea ua avea nei ma failautusi ae o le Taitaifono o le susuga ia Rev Lisatisone ma le faletua ia Faitauga Taufao lea o loo tausia le ekalesia Uesiliana Metotisi a Inala.
Na mae‘a le sauniga ona see lea i le hall auā vaega e pei ona masani ai aso faapenei i osiga feagaiga. Na muai usu faaaloalo le ekalesia ma le matagaluega i le alii taeao, ona faagasolo lea o polokalame.
Sa fai le fetalaiga ia Fao ma fofoga o aiga na lua na te molimoli mai le susuga i le faafeagaiga ma le faletua, e lē gata i le Ekalesia i Forest Lake ma le matagaluega, a o le taliaina foi e Rev Evile ma Tuumuli Pule o le valaauga a le Atua.
O le failautusi o le Ekalesia Forest Lake, tofa Tuuaso sa fai ma sui o le Ekalesia e talia aloaia ma faafetaia e lē gata i le faifeau a o faaaloaloga o se valevale alofa o le faamata e fia o le Matagaluega ma Ekalesia mo le faifeau ma le faletua ma aiga na lua.
Sa vaaia foi measina a le atunuu, tupe mamala, ma le tele o le palapala mālō i le faamoemoe. Sa molimolia le faafetai a le ekalesia ma le atunuu e le tofa Tuuaso ma faaiu ai e le Taitaifono i le Tatalo.
