E leitioa foi a saafi le Tusi Paia ma faapea ane, ‘E leai se mea e sili i lo lenei, pe a ou faalogo o savavali la‘u fanau i le upu moni.’
O moomooga e laualuga i soo se matua Kerisiano, se tasi o le fanau ae oo i lenei tulaga o le faaipoipo, auā o se aso sa lalaga faatasi ai manatu, sa leai se peau e toe lagavale. Ua se taotoga foi a i‘a sā, auā ua faafesagai segaula ma ua fetapa‘i i le lagi e mamā ma le soifua maua o aiga-na-lua.
Ua mae‘a paniniu le faamoemoe sa lupe, o le faamaufaaailogaina lea ma le tuufaatasia e ala i le sakalameta o le faaipoipoga, o le alii o Fautua Kilipati ma si ana manamea, le faatoanofotane ia Melissa Rosie Fautua i le Aso Toonai, aso 13 o Mati.
Ua aofia moli i le futiafu e tasi ma atoa tupe i le fafao, ina ua tini lau o le faamoemoe ia i laua, i le tele o taimi sa taumate ai pe tua i ni ā o la moomooga, lenei ua taunuu manuia.
O le ta‘ita‘i o le sauniga sa feagai ma le faapaiaga o le aiga fou, na nafa lea ma le suli o le Atua, le susuga i le Faafeagaiga ia Rev Peniamina Tuifaasisina mai le Ekalesia EFKS a Crestmead i Brisbane. Sa auai ma le faletua ia Lesa Tuifaasisina.
Na lagi fetaliai le aiga fou i tautinoga atoa ma le taliaina o mama, ua faamaonia ina ua molimauina e le paia ma le mamalu o le auvalaaulia le saunoaga a le ta‘ita‘i o le sauniga “Ua avea nei i laua ma tino e tasi, o se ulugalii ua faapaiaina i luma o le Atua”. O upu foi ma timaiga na tōtōina i o laua loto, e talitonu o se faamausaliina lea o le mafutaga ina ia tumau pea le mafana, e faigata ona maluelue i le malosi o le fili ma le alii o lenei lalolagi.
Ua paia le laueleele, ua paia foi le sami, paia fafo ua paia foi fale auā na malualii le tapuaiga a auauna totofi a le Atua ma faletua sa faamalumalu i taimi o le sauniga ma nofoia le tausamaaga, na lau i ula ai le fale nai Amoa.
Le Susū ai o le Susuga i faafeagaiga EFKS i Brisbane Susuga ia Rev Perelini ma le faletua ia Tili Tauilo, Rev Parataiso ma Salom Afaaso, Rev Pevise ma Shirley Leo, Rev Aofaiga ma Lolou faapea le Faletua ia Sarai Tuifao ona sa feagai foi le susuga ia Rev Petaia Tuifao ma tuatuagia faaekalesia. O nisi o malo faaaloalogia sa maualuga ai le aso ina ua talaaao atu ma talia le valaau faaaloalo a le ulugalii fou e molimauina lo laua aso faapitoa.
O tuaa o le alii faaipoipo ia Fautua Kilipati, o si ona tamā o Iliolemalae Apulu Asivao Kilipati mai le alalafaga o Satapuala, Faleasiu ma Fasitoouta, faapea le tinā ia Olepa Kilipati mai Satuimalufilufi ma Satapuala. O tuaa o le tamaitai faaipoipo ia Melissa Rosie, o si ona tamā o Auga Tofi Iuli mai Falefa ma Tuanai, ma le tinā ia Selau Iuli mai Fasitoouta.
Na faafiafiana aiga-na-lua i le tele o aiga ma uo na malaga mamao mai Niu Sila, Samoa faapea nisi vaega o Ausetalia. O le Susuga ia Tauiliili Ita‘otemai Suni Pepe Patū sa avea ma pule o le tausamaaga ma fai ma fofoga o le aso, o le Sui Faatonu o le leitio 4EB 981FM.
Na matua faamalieina uma finagalo i le felanulanuai o taumafa sa tapenaina e le faleaiga ua lauiloa i faamoemoe ma aso tetele o le atunuu, le Uncle Sam’s Catering, le susuga ia Poulava ma le faletua ia Lorna Matautia ma le aufaigaluega laufofoga tausaafia.
