E matautia le taalo a Seiuli ina ua sui atu i totonu ile au ale Highlanders ile ‘afa lona lua ole taaloga ma le Brumbies i Canberra.
O lana sikoa ile toe 4 minute uma le taaloga na fesoasoani malosi lea ile manumalo ale Highlanders ile Brumbies (18-13). A‘o osofai ele Highlanders le laina ale Brumbies ma tuutia mai lava, ae pasia loa e Aaron Smith le polo ia Seiuli ile lima mita mai le laina sikoa. Na uu lelei le polo ma sulu maualalo i lalo o pue ale foueki ale Brumbies, ma palasi ai Seiuli latalata ile laina sikoa. A‘o lona malosi na tulei ai lona tino ma ova ai ile laina, a‘o afisi pea e ia le polo lakapi nei mamulu.
E lei fesiligia lava ele laufali le sikoa a Seiuli. O tulaga masani pe a sikoa se tasi, ae maise ai i taaloga e lalata ai e lagona e le au atoa le fiafia. Na matua fusi e Aaron Smith Aki Seiuli, i lona laveaia ole Highlanders mai le faiaina.
O Seiuli na fanau i Kalaiesetete, ua 24 ona tausaga. Ae o Timaru na nofo ai ma lona aiga a‘o laititi lava o ia. Na lelei tele le lakapi ale alii a‘o aoga, ma avea ai o ia o kapeteni ole au malosi a Timaru Boys High School. Na amata taalo i taaloga faaitumalo a‘o aoga pea o ia, ile tausaga 2012 na taalo ai mo South Canterbury ile Heartlands Championship.
Na uluai maua lona avanoa ile 2014 i totonu ole Super Rugby, peitai na faatoa maua lona avanoa taalo ile 2016 e taalo ai. E lei maua sona avanoa i tausaga ia, 2014 agai mai 2016, ae na faaleoleo mo tama manunu‘a ole Highlanders.
Ile 2014 na faaleoleo ai o ia ile taaloga ale Highlanders ma le Hurricans (16, Me 2014) peitai e lei faaaogaina o ia e lei taalo. Ile tausaga na sosoo ai, 2015 na faapea ai foi ona toe filifilia o ia e faaleoleo aunoa ma se taaloga.
Ae ole 2016 ina ua manua Brendon Edmons na maua ai lona avanoa e avea ma pou faaleoleo i a Daniel Lienert-Brown ma Craid Millar. E fitu ana taaloga mo le Highlanders ile tausaga ua tea. O ia avanoa na maua ona o manu‘aga i isi alii taalo.
Ole tausaga 2017 ole tausaga muamua lea ua maua ai lona avanoa tumau ile au. Ina ua avea avea Tony Brown ma faiaoga ale Highlanders, auā e masani lelei Brown ile taalo a Seiuli a‘o taalo ma Seiuli ile au NPC a Otago le na faiaoga ai Tony Brown.
Ole alu ese ai o Jamie Joseph ile tausaga ua tea na see atu ai Brown e avea ma faiaoga ale Highlanders, ma maua ai ma se tulaga tumau o Aki Seiuli ile ‘au. Na amata taalo Seiuli mo Otago mai le 2012.
Ua 48 ana taaloga faaitumalo mo le au. Ole toe filifilia o ia ile au mai le amataga ole tausaga nei, ua faateleina ai ana taaloga mo le Highlanders.
O lona tulaga masani ole pou i luma ole sikalamu. Na vaaia ai lona finau malosi ina ua alu atu i totonu. Aemaise ai le matua lelei o lana puipui i taimi o osofaiga e tele ale Brumbies.
Ole sikoa muamua foi lea a Aki mo le Highlanders na maua ile taaloga ma le Brumbies. Ole faamoemoe a Seiuli, ia avea le malosi o lana taalo i lea taaloga, atonu o lea maua ai ma sona avanoa e taalo ai i se taaloga atoa, ae e le ole faaleoleo.
Talaaga o Aki Seiuli
Fanau, Kalaiesetete, 1992
Matua, 24 tausaga
Aoga kolisi, Timaru Boys High School
Tulaga, Prop / Pou
Maualuga, 184 cm
Kalapu NPC, Otago 48 taaloga mai le 2012
Super Rugby, Highlanders, 7 taaloga mai le 2014, 2016-2017
