Ofi Vaniah Toloa tauvaga tagata Pasefika talenia i musika

E toatele lava alo ma tamafanau a lo tatou atunuu ua iai le tomai ma le taleni i le musika, ma ua faaeaina foi le tomai o nisi o alii ma tamaitai i tauvaga faavaomalo faapea le tauvaga o musika a tagata pepese ma fatupese o le pasefika. Peitai o lea foi ua ofi atu i ai se tasi o alo o Samoa ma Tokelau le alii o Vaniah Toloa ma si ona tuafafine o loo la atinaeina faatasi lenei tomai.
O le tauvaga a tagata musika o le Pasefika o lenei tausaga 2013 ua filifilia ai Vaniah o se tasi e tauva i le sailiga o le siamupini poo le tagata manumalo i nisi o vaega o le tauvaga, le Best Pacific Male Artist, poo le alii silisili ona lelei i le musika, ma o le tauva ma isi alii talenia i le musika o Savage ma Swiss.
O le a tauva foi o ia i le vaega o le Best Language Album lea foi o le a tauva ai ma se aufaipese a se ekalesia i Magele ma se isi alo o le atunuu o Mr Tanoa.
Fai mai Vaniah e lei mafaufau lava o le taimi lenei e alu ai i se tauvaga tele faavaomalo i le taleni o le musika, peitai o nai ana uo lava ma paaga na unaia o ia lea ua ulufale ai i le Pacific Music Awards 2013.
“Ia o le viiga lava o le Atua e muamua ua maua lea faaeaea. Because I’m always focused on the music, I never thought anything of Awards. Everyone kept telling me that it is being recognized and is a gesture of appreciation for all the hard work. Now it means so much more to me. Getting nominated amongst these big names (mainstream) means that any kid from Samoa and Tokelau can do it if work is put in.
E faafetai i mātua ona o le lagolago ma le tapuaiga, aemaise aiga, nuu ma alalafaga e lē gata i lea o Ekalesia sa tapuaia faiva o i ma‘ua ma le tuafafine. Ia lilo o ma‘ua tagata faatauva’a, ae silisili ai se viiga o le Atua.”
O le tasi vaega tāua o le tauvaga o le faailoga e ta‘ua o le Auckland Council’s People Choice Award, lea e palota ai tagata poo ai le alii ma le tamaitai pese poo le album foi e sili ona fiafia i ai. O se avanoa lea o paaga ma uo mamae a le alii o Vaniah ma lona tuafafine e ave ai le latou lagolago pe afai e mananao e avea lea tamafanau a le atunuu ma se tasi na te maua lea faailoga tāua.
E iai foi nisi alo ma tamafanau a Samoa o loo tauva mo faailoga eseese o lea tauvaga, ma o le tatalo ia a‘e manuia a latou taumafaiga, auā e faaeaina ai lava le atunuu ma le tapuaiga a mātua ma aiga.
O le masina fou o Me e faalauiloa ai i latou o le a mautulaga, ae talosia ia le taumafai o le susuga Vaniah ma si ona tuafafine. Ua tele nai a la fatuga ua faalogoina i luga o leitio ma ua pepese ai le toatele aemaise lava le tupulaga talavou.