E maeu le faagasolo pea i luma o le faalogo atu i taleni eseese ua maua e o tatou tupulaga i nei ona po.
O le faatinoina o le tala i le “Fatu na totō” e pei ona ta’ua i luga ua alo atu iai ni alo talenia o Samoa i le Laumua i Ueligitone. O nei alo o Samoa sa a’oa’oina i matata tau faafiafiaga(Performing Arts) ua maua ai o latou faailoga(degrees) ma ua faasoa atu lo latou tomai e ala i le faatinoina o ni tala faasamoa.
O le tamaitai o Tupe Lualua o loo faatonuina le tala(Director) ma oloo lagolago i ai le tamaitai o Martha Samasoni. O Tupe Lualua(Savaia Lefaga & Luatuanuu) o loo ua tauave nei lona faailoga o le Post Graduate i mea tau faafiafia i le Iunivesete o Vitoria, ae sa a‘oa‘oina o ia i lona faailoga o le Bachelor in Performing Arts i Whitireia New Zealand.
O Martha Samasoni o se tasi foi o alo o le atunuu ua leva ona feagai ma le galuega o le tapenaina o faafiafiaga faatifaga ma tala faakoneseti e pei o lea ua toe galue ai i le “Fatu na totō”
O le tala e faaautū i le malaga mai o mātua mai Samoa ma faataunuu i Porirua ona o le naunau ia faaaogāina le fanau mo se lumanai manuia.
Manaia foi ae malaga i ai e maimoa lenei tala ma nai fanau e latou te iloa ai le mafuaaga o le malaga mai o mātua mo se sailiga o manuia mo a‘oa‘oga a le fanau.
E faamalo atu ai foi i nei alo o le atunuu ua latou sogasoga i mea lelei mo le soifua atiae i totonu o nei atunuu ese.
