O le mata‘u i le Atua o le amataga lea o le poto

Auā sa ou saili ona ou maua lea, sa ou tu‘itu‘i foi ona tatalaina mai ai lea. Na toetoe a ou faavaivai ae sa ou manatua pea ma talitonuina le alofa tunoa o le Atua, na toetoe lava ina o le a ou faamaamulu ae sa ou lagonaina pea le pa‘i mai o le musumusuga a le Agaga o le Atua.
O lenei la ua tinipa‘ō ai nei le uto ma ua tau nei lau o lo‘u faamoemoe, ona ou faapea ane lea, Le Atua e, o ai ea a‘u nei ua e manatu mai ai, a o le saunoaga foi a le atalii.
Se mea ina a matagofie o le sailiili ma le Alii, se mea e manaia o le usitai ma faalogologo atu i le pa‘i mai o le fesoasoani a le Agaga aemaise lava i taimi sa faafaigata ai ma toetoe ai a muta le faamoemoe ona e lei faigofie ona tauiviina lona taumafai i nai tausaga sa aoaoina ai i le Iunivesite i Aukilani.
O le Aso Lua na faia ai le faauuga a le Iunivesite i Aukilani ma na lotolotoi ai ma le atalii poo le alo o Peoalii Luafa Maelega Lilo ma le faletua ia Naomi Peoalii, le Susuga ia Savali Peoalii Luafa Maelega Lilo.
Ua faaiuina nei ma ua faamanuiaina ai le susuga ia Savali i le faailoga o le Bachelor of Arts.
O se laasaga lelei tele ma ua matuā lagona ai le fiafia ma le olioli i nai ona tuaa ma la faapea ane ai. Le Atua e, o ai ea i ma‘ua ua e faamanuia mai ai i le atalii, auā e vaivai lava ae ua e faauuina si a ma tama, ia tumau pea lou viiga nei ma ia oo i le faavavau faavavau lava.
Na faaalia le fiafia tele o nai tuaa ma le fai tama lava o nai o tatou mātua i se taumafataga tele na faataunuuina i le Aso Toonai. O le faamoemoe o le faafoi atu lea o le faaneetaga ma le viiga i le Atua ona o faamanuiaga ua ausia e le atalii ia Savali.
Sa faapena foi ona faaalia ai le loto fiafia tele o nai aiga ma na lagiina ai e le susuga ia Solofa ma le faletua ia Makerita se pese matagofie na momoli ai o laua alofaaga ma faamanuiaga mo Savali Jr, aemaise foi o upu faalaeiau ma fautuaga matagofie na fofogaina e tamā ma tima matutua o si ona aiga mo ia.
O le faafetai tele foi i nai ona mātua matutua ia Fenunuti ma Nive, o aiga uma sa faia le faiva o le tapuaiga ma tu‘i pea le mulipapaga ae faasilisili foi ona momoli le faafetai tele i le Susuga i le Faafeagaiga Savali Fenunuti L. Ioane ma le faletua ia Taito Faaleava F. Fenunuti mo le faaauauina pea o galuega lelei aemaise o le fafagaina pea o le atalii i fautuaga ma le faamalosi, o lea ua iu manuia ai ana taumafaiga uma, o le viiga silisili lava lea o le Atua.
Ia ua faamalo Savali Jr le onosai, malo le tauivi ma le filiga, faafetai foi le faaea aiga ae maise o lou faamalosi pea ma lou talitonuga i le alofa o le Atua o lea ua e manumalo ai ma ua e ausia ai lenei laasaga tāua o lou soifua.
Ia Savali o upu a Feepo i lona atalii o Leatiogie ina o le a alu i lana taaloga, Atalii ia tafetoto ou ala, o ou māmā na ma ia pouliuli lou tino ae ia malamalama ou ala. Ia o lagona na ua faaalia e nai ou tuaa ma nai ou aiga uma, ia maua sou lumanai manuia ma ia sagai ane faamanuiaga a le Atua e mo oe ma au saiiliga ia maua se galuega e faaaogāina ai lau taleni e pei ona ua faauuina ai nei oe.
Ia faasilisili foi ona faatinoina e tautua ma auaunaina ai aiga ma tagata lautele o soo se atunuu. Alofaaga mo oe mai ou mātua peleina, le Susuga i le faafeagaiga ma le faletua ma le nofoaalo, o nai ou mātua matutua aemaise o ou aiga uma lava i soo se vaega o le kelope.