E talitonu le Taitoafitu a Samoa e sao i le latou taumafai ma oo le ‘au i le taaloga a le Olimipeka i Rio de Janeiro.
O le faaaliga lea a alii o le ‘au ma le latou talanoaga ma le Tusitala i le vaiaso ua tea nei. O le feiloaiga na faia i Apia, ma Ed Fidow, Alex Sefilino ma George Asofolau. O le mafuaaga o lenei feiloagia ona o le nofo tapena a le ‘au mo taamilosaga faaiu o le 2015/16 a le Lakapi a le Lalolagi.O loo tapena nei le Fitu a le Manu mo taamilosaga e lua o loo totoe i Pale i Farani ma Lonetona i Egelani. O le taamilosaga i Falani o loo loma nei e faia lea i le vaiaso 13-15 o Me, sosoo ai ma Lonetona i le vaiaso e sosoo ai, 20-22 Me.
A mae‘a taaloga mulimuli ia ona see atu loa lea o tapenga a le ‘au auā le sueina o se avanoa i Rio i le taamilosaga i Monaco i le aso 19 o Iuni.
O le taamilosaga i Monaco o le a maua ai le avanoa e sao atu ai i Rio le ‘au e tasi. O isi ‘au o le a tauva ma le Manu mo lea avanoa e i ai Tonga, Kanata, Rusia ma Sepania.
Na faaalia e Sefilino ua iai nei le talitonuga a le ‘au e mafaia e i latou ona ausia Rio. E mafua mai lea i o latou lagona ua ese le tulaga ua oo i ai le ‘au lenei i lona malosi ma le lelei talu mai le taaloga faaiu o le taamilosaga i Sigapoa lea na malolo ai Niu Sila i le Manu 26-21 mo le Ipu Mafolafola poo le Plate. Fai mai Sefilino, ma faaluaina e Asofolau, o le taimi lenei ua matuā saoasaoa lava le ‘au. Ua lē toe nofo taumate foi tama o le ‘au poo fea o le a oo i ai le taaloga i soo se taimi, ae e pei ua iloa e i latou uma lava le faasologa o le taaloga. Tusa lava poo fea o iai le polo, o iina foi ua oo atu ai ma le tulei lagolago a le ‘au taaalo.
E pei la o le tatao faaiu a Tila Mealoi i le taaloga ma Niu Sila lea na manumalo ai loa ma le Manu i Sigapoa. Ina ua tau alu i fafo le pasi a Niu Sila ae ua uma minute o le taaloga, e togi mai i totonu e le Niu Sila le polo ae ua leva ona iloa e Mealoi le mea o le a oo atu i ai le polo. O iina na ia sapoa ai le polo ma tamoe atu ma sikoa ma faia‘ina ai loa ma Niu Sila i le Manu.
O le isi mafuaga o le talitonuga a le Fitu a le Manu ona o le alualu pea i luma o le latou masaniga, o tama uma o le ‘au. O le taimi lenei ua pei i latou o se auuso, e aunoa ma le toe tau matemate o le isi i le tasi. Ae ua pei ua kiliki faatasi tama uma, ma ogatasi ai le iloa o le isi ma le tasi. O le a faaaogā loa la e le Manu le taaloga i Falani ma Lonetona e nofo tapena ai mo Monaco. E mananao Samoa e alu i luga le latou tulaga mai le numera iva o loo iai nei ae agai atu i le tulaga valu poo le fitu foi pe a mae‘a Lonetona.
I le fesiligia o le taamilosaga i Monaco na faaalia ai e Ed Fidow, o ‘au o loo latou vaavaai toto‘a i ai, o le au lea a Toga ma Rusia. Fai mai ua matuā alu i luga le malosi o Rusia ne‘i te‘i ua mao Rusia i le taamilosaga lea.
Ae lē gata i lea, e lē faagalo foi e i latou le foufou mai o Toga. Ae i le latou lava talitonuga, o le Manu o le a ea mai lava i le mae‘a o taamilosaga i Monaco.
