Manaomia se teuteuga o le faavae e puipuimalu fanua faaleaganuu
“E sa’o Faapale, o Samoa ua i luga nei o le gaga. E lē gata pe faapefea ona puipui malu ia eleele tau le aganuu mai le faatau motu atu i tagata poo kamupani mai fafo, ae pe faapefea ona malupuipuia i tatou mai ia i tatou”.
O laina tomua ia o le finagalo o le afioga Tui Atua Tupua Tamasese Efi na saunoa ai ise tulaga faalauaitele i le mataupu o loo tapisa ai finagalo o le toatele i fafo ona o le tulafono o le lesitalaina o fanua na pasia e le Palemene i le tausaga e 2008.
O le susuga Faapale Tumua na faasalalau faalauaitele sana tusi na ave i le Tui Atua sa ia talosaga ai i se galuega a le Tui Atua i le mataupu lea na mafua ai ona faia le saunoaga a le Tamaaiga ma valaau ai tusitala ma le aufaasalalau e molimauina mo a latou lipoti ma tala e faasalalau i auala o fesootaiga e pei o nusipepa, televise, leitio ma fesootaiga i luga o upega tafailagi.
“Ua manino mai, mo i tatou o ta’ita’i poo faauluuluga o aiga poo le Malo, e ao ona o tatou saili se fofo o le toatuga e mafua ona o le numi, poo le laufetoa’i o mau i totonu o le Mataupu 102 o le Faavae o le Malo o Samoa”.
“E ao ona o tatou ioe pe a fuafua i le molimau manino ma le malamalama, o le numi lea ua iai nei ua faaaogāina e nisi e soloia ai le agaga ma le aano o le Mataupu 102, o lona uiga, ina ia puipui eleele tau le aganuu mai le faatau motu atu i ni tagata mai fafo. O le aso o la’u talosaga, ona o le atunuu ma le Malo o Samoa e faavae i lona faasinomaga ma lona tofi, ma o nei mea e fofoa mai le ‘afu’afu o eleele tau le aganuu, e ao ia i tatou ona tatou tutu faatasi e faafoe ma fofo le numi lea ua tulai mai i le teuteuga o le vaega lea o le Tulafono Faavae. O le tatou aiātatau lea.
O i tatou o suli o eleele tau le aganuu i Samoa, pe alala i Samoa pe leai”. O le vaega lea o le finagalo o le Tui Atua ua ia tatalo ai foi i le Malo ma le Palemene ina ia teuteu le vaega 102 o le Faavae ina ia mautu ma mausali ai o le lisi atu o fanua faaleaganuu ia aua ne’i aofia ai ni mokesi pe faatau motu.
O le faatoa maua lea o se laolao e sasaa ai le finagalo o le Tamaaiga ina ua mae’a le savali tetee filemu i Savaii i le lua vaiaso talu ai, lea sa faamoemoe e saunoa ai. Peitai o tala’iga a le komiti sa faamaopoopoina le savali sa ta’ua ai le afio atu o le Tui Atua e saunoa i lea savali tetee, na vave ona salalau ai se lipoti ua lē o finagalo o ia e faia sea tulaga.
Pe ana leai le tusi a Faapale na lomia ma faasalalau e le lagona le loto nutimomoia o le Tui Atua ma manao loa e saunoa i le mataupu. O loo mausali le finagalo o le Malo o le lisi atu o eleele faaleaganuu e fai ai pisinisi e manuia ai nuu ma aiga o Samoa i seleni o lisi.
Peitai o le finagalo o le Tui Atua ina ua fesili iai le autusitala na ia saunoa mai ai, o atugaluga ia auā o tupe e tosina iai tagata ae a faatamala le aiaia lelei o tulafono e puipui ai fanua ma eleele faaleaganuu e lē taumate i le lumanai e au ina mamulu ma aveese ai le tofi o le suli e aiā i eleele tau Samoa.
O se isi atugaluga o le Tamaaiga o le faapea mai o se aiaiga o le tulafono o le lesitalaina o fanua faaleaganuu lea ua iloilo e se komiti a le Palemene, o le ave o le pule toatasi i le Sa’o e faia ai le faaiuga o le lisi ae ua noa se silasila i suli o latou na filifilia le Sa’o.
O le isi aiaiga o lea tulafono o le saini o le Minisita e faamaonia le ioega a le Sa’o pe a mautu feutana’iga o se lisi. E lē o afaina i le finagalo o le Tui Atua le ave o eleele faaleaganuu e le Malo mo ni galuega mo le atinae o le atunuu, ae ua popole i le lisi i faipisinisi mai fafo.
O le afioaga o Sasina e selau tausaga ua lisi ai o latou eleele e tusa ma le lima selau eka mo ni atinae tau pisinisi ma le totoina i le laau o le nonu. E le o mokesiina eleele o le nuu e pei ona faailoa e le faipule le susuga Laaulialemalietoa Leuatea Polataivao Schmidt. Peitai o le isi lea lisi ua saunoa le Tui Atua e ao ona mataala iai ini tulaga e ono lamatia ai eleele o le afioaga i le lumanai.
