E fā vaiaso na lūlū ai le saito ae selesele i le po o le Aso Faraile, 17 o Me 2014. Na malaga mamao mai le taitai aoao o le Ekalesia Aso Fitu Samoa tutoatasi le susuga ia Pr Willie Papu e folafolaina le upu e pei ona molimau mai le Tusi, ia outou o atu e fai nuu uma lava ma soo ma papatiso i le suafa o le Tamā le Alo ma le Agaga paia.
Sa auai mai foi susuga i TMI (Talavou mo Iesu) sa faapea ona saili uso asiasi e faafofoga i le upu o le valoaga sa folafolaina e lana auauna. E lata i le 200 uso valaaulia i po taitasi ma e viia le Atua ona o le galuega mamana a Lona Agaga na galueaina i finagalo ma loto o tagata. Na solosolo lelei mea uma leai se vevesi. Na taualuga faigamea a le lagi i le papatisoina o agaga e to‘a 37 i le po o le Aso Faraile ae to‘a 48 i le taeao o le Sapati maua ai le aofaiga o agaga fou e toa 85.
E toatele susuga i faafeagaiga faapea nisi o sui o le komiti sa auai mai e molimauina lea faamoemoe tāua e pei ona malaga mai ai le taitai ia Pr Willie ma le faletua ia Tiana Papu ma le nofoaalo. Na faaiu i se taumafataga tele i le aoauli o le Aso Sa e fiafia ai ma agaga fou aemaise uso uma sa valaaulia faapea malo faaaloalogia.
O Auapaau Faasau Lemuelu o le faatamā o le va i fafo a Kuiniselani sa fai ma fofoga o le aso ae o Sauoaiga Toli sa tu tootoo auā faaaloaloga. Sa faia foi le faatau paia a Samoa ma na tasi moemoe lava i le fofoga o le Ekalesia aoao, ia Tuautu malaga mai Niu Sila e faia se upu faafetai e talamasinei ai faaaloaloga maualuluga sa gapatia i ai le matagaluega Aso Fitu Samoa Tutoatasi a Kuniselani.
O le fale‘aiga a le Uncle Sams Takeway (Poulava Sam ma Lorna Matautia) sa faapea ona tapenaina le fofoga taumafa. E momoli le agaga faafetai i le taitai e tusa o le upu folafola ua tau ai lau o le faamoemoe, e ao pea ona foi le viiga i le Atua.*
