O finauga faaiu a le itu a leoleo ma le loia o loo tulai mo le afioga Tupuola Terry Tavita o le a toe faafofoga ai le faamasinoga i ni mau a itu e lua e lagolago ai moliaga a leoleo, ma lagolago ai le tetee a Tupuola le faatonu o le nusipepa o le Savali, le nusipepa a le Malo o loo molia i le faaoolima matagā, fai o ni upu palauvale ma le faaoolima.
O le molimau a le alii faatonu o loo faamalolo mai lana galuega i se taimi lē tumau e faatali ai le faaiuga o ona moliaga ma lona faamasinoga, na molimau ma faaalia le tumau pea o lana tetee. Sa ia faaalia o ni ana tala tausua ma fia faamālie na ia faia i le tamaitai o Maria lea e ana le tagi ua molia ai o ia e leoleo.
O lana tago i le vae o le tamatai sa na ona ia eu. O le faapea mai foi o le tamaitai i lana molimau sa ia taumafai e saili se nofoaga i ni faletalimalo i le atu Aleipata e o i ai i lona faamoemoe e faia ai se solitulafono, e sese. O lana faamatalaga sa fia maua se nofoaga e tau ina la mapu ma malolo i ai ma le tamaitai ina ua agai i A‘ufaga e lipoti le saofai a le alii fusu o Joseph Parker.
E lua aso na tupu ai nei gaioiga ae eseese aso ae o le vaiaso lava lea e tasi, le vaiaso lona fā ma o le toe vaiaso lea o le tamaitai o Maria ma Lesina i le nusipepa o le Savali, ona mae‘a lea o le la observation poo le mataitu lea o le faiga o galuega faanusipepa ma le tiute o tusitala. O laua e aooga i le vasega o aoaoga faatusitala ma faasalalau i le Iunivesite aoao a Samoa.
O Lesina le tamaitai lea e faapea sa manao Maria la te o i A‘ufaga faatasi ma Tupuola, peitai na molimau Maria na vavao e lē ua molia e nofo e fai i ai galuega. O le sui faatonu foi le susuga Mamea sa tuu e o ma Tupuola ona e iai se ‘ava usu e fia momoli i le faafotu tupu o Joseph Parker ma o Mamea e faia le tala.
Peitai na molimau Maria na suia uma ia fuafuaga i le nofo o Mamea ma Lesina ae na o laua ma le alii faatonu na malaga.
O le folasaga a leoleo na ta‘ua ai o le aso 16 o Tesema 2014 na muamua o ai na o Tupuola ma Maria i le taavale a le ofisa e lipoti mai se sauniga i Mulifanua, lea na oso ai i le auala i Aleisa ma le faamoemoe i Mulifanua.
Sa faamatala e Maria i lana molimau o le la malaga lea na tuu fesilisili atu ai lē o loo molia pe fai sana uo. Sa tali i ai e leai, ma fai atu ai Tupuola pe fia uo i le pule o le Savali. Na fesili poo ai ae tali le alii o Terry Tavita.
Na alu pea le la taavale ma fesilisili atu ai pea lē o loo molia ma fai atu pe late o i lona fale (Tupuola) e leai se isi o iai na o ia. A taunuu ona fai lea o se la meaai, ona alu lea e taele ona sulu ‘ao‘ao ane lea o se ie mo le faia o se la feusuaiga. O le malaga foi i Mulifanua na tago atu ai lē o loo molia i lona vae ma e faalua ona faatino lea gaioiga ae sa ia aveese le lima o le alii faatonu.
Fai mai Maria i lana molimau na oso ifo ni ona lagona lē talitonu e mafai e le pule poo le faatonu ona faia ia uiga ma tala ia te ia. Na oso ai lona fefe toe inoino. Na mae‘a le aso lea va i le aso e tasi ae aso 18 o Tesema 2014 agai loa i A‘ufaga mo le saofai ae tupu ai foi se isi gaioiga lea na ta‘ua e Maria i lana molimau na iu ina palauvale atu ai le alii faatonu, ma faapea ana tala, se ana iloa lava ta te lē o mai.
O nei vaega uma o le molimau a le tamaitai o loo matuā teena e Tupuola, peitai na tautino Tupuola e leai se ioega a le tamaitai poo se faatanaga, pe na malie foi e tago lona lima i le vae o le tamaitai.
O lea tali a Tupuola na mafua ina ua tuliloa pea e leoleo i ni fesili ina ia faaalia i le faamasinoga, sa taalo fia mālie ma tausua i le tamaitai.
