Miliona taui tupe totogi e le Malo i le kamupani a le Siva-Afi Design

E luasefulu tausaga o le lisi na saini e faaaogā ai e le kamupani o le Siva Afi se vaega o eleele o le Malo i Sogi. Sa vaaia le sologa lelei o le pisinisi a le susuga Lene Leota ma lona faletua o Claire, ma ua maua ai foi ma galuega a nisi o tamafanau a le atunuu. Toatele foi i latou sa fiafia e eva ma tafafao i le faleaiga ma le fale faafiafia o le Siva Afi, e sosoo lava ma le vaega sa faatino ai le isi ana tautua o le lolomi o mitiafu ma lavalava.
Peitai ina ua iai le fuafuaga a le Malo e fausia le maota fou i se fesoasoani a le Malo o Saina i le fanua sa iai le ofisa tutotonu o le Esetete Tausi i Sogi e aofia ai ma le fasi fanua sa lisi e le Siva Afi, na faia le faaiuga e faamuta loa ma le lisi a le kamupani.
Sa faia feutanaiga i le va o le Matagaluega o Punaoa Faalenatura ma le Siosiomaga ma le kamupani faapea ma le ofisa o le Loia Sili a le Malo. Peitai e lei taunuu i se taunuuga filemu ma tala ese ai loa fale uma o le kamupani ma o ese.
Na faifai tetele le finauga ma ave ai e le Siva Afi le mataupu i le faamasinoga mo se taui i le faamuta o le lisi e lei uma tausaga, ma le totogiina o le tau atoa na siitia ese ai meatotino a le pisinisi.
Na aumai le faaiuga e na o le $300,000 le taui tupe na maua e le Siva Afi, ma e lei faamalieina ai le susuga Leota ma lona faletua, ma toe ave ai le talosaga i le Faamasinoga o Talosaga Apili le Court of Appeal. Sa suesueina lea talosaga i le faaiuga o le tausaga ua mavae, ma tolopo ai se faaiuga a le faamasinoga.
O le amataga o le tausaga na faatoa faailoa ai le faaiuga i le loia sa tulai mo le kamupani, le tamaitai loia, le afioga ia Leuluaialii Olinda Woodroffe, ma o se faaiuga ua faafiafiaina ai Leota ma Claire e pei ona aumai le taui e tasi le miliona fā selau afe e pei ona faaalia e Leota.
O le vaiaso na tea nei na fuafua e tatau ona maua ai le siaki tupe o le taui, ae peitai na faaalia e se molimau faatuatuaina, e lē sa‘o le aofaiga o le tupe na avatu, ma toe faafoi ai i le matagaluega o Tupe a le Malo.
E tuuina atu lenei lipoti mo le faasalalauina e lei toe maua se faamatalaga po ua tauaao e le pulega o le kamupani le siaki tupe ua manumalo ai lana finau i se taui. Ae o se tasi lenei faamasinoga ua mautinoa ai e iai vaega sa lē ausia i tapenaga a le Malo ma ua alu ai le miliona ma ona tupu a le atunuu.
Ua faailoa mai e Leota e oo loa ina avatu le siaki tupe ona logo lea o le autusitala mo se feiloaiga.