O se tasi lenei o taaloga ua lē o toe popole tele i le tulaga i malae mo taamilosaga i totonu o Samoa i lona nofoaga autu i Tuanaimato, i le nofoaga fou lea na saunia e le malo i ana polokalame i tausaga ua mavae. Ina ua asia lea nofoaga e molimauina le lelei atoatoa o malae faapea ai foi ma lona Ofisa autu, o se vaega matagofie tele lea pe a toe manatu i tausaga ua tea i le tausavali solo i nofoaga e pei o Malifa, Vaivase i le Kolisi o Samoa, Moamoa i le Kolisi a Chanel faapea foi Lotopa i malae a Malisi ma le tele o isi nofoaga sa agai i ai le tele o Au sa tausinio ai i taaloga Soka i Samoa i tausaga ua mavae.
Peitai ua mapu mai i ia tulaga ae ua agai tasi uma i le nofoaga autu i Tuanaimato. I le faagasologa o taaloga ina ua afea o loo iai taamilosaga faapitoa a tamaitai e ese mai i taamilosaga i le itupa o alii. E pei ua e silasila ma maimoa i taaloga i luga o televise i le siitia o le faatinoga o le taaloga lenei i Samoa, o le faatāuaina o tulafono o le taaloga, o galuega faalaufali i taaloga faapea malae i teuga.
E talafeagai ai auā ua lē o toe ese lava mai atunuu i fafo, pau le vaega e lei maua mai o le tulaga o loo iai ni taaloga faalevaomalo ma atunuu i fafo i lenei taaloga ua ausia e Samoa, ae faapea foi le mamao o loo iai se avanoa e ono sao atu ai Samoa i le taamilopsaga o le Ipu o le Lalolagi i lenei taaloga i le lumanai.
O loo faagasolo polokalame i Aoga, Nuu ma Afioaga i le tau faafaileleina pea o lenei taaloga. Tasi lenei taaloga ua lelei atoatoa le nofoaga i malae taalo i Samoa, talosia ia lata mai se avanoa e oo atu ai Samoa i finauga ma Au tetele i le siosiomaga o loo iai tama matutua o le taaloga o le Soka.
