O lea ua faalauiloa mai le lisi o i latou ua faamanuiaina i le Kapeneta a le Malo Niu Sila i lenei foi 3 tausaga ua savalia. O le lisi ua faalauiloa mai ua faapea ona faamanuiaina ai ma le afioga Peseta Lotu Iiga ina ua filifilia o ia e avea ma Minisita o Falepuipui (Corrections), Minisita o Atunuu Eseese (Ethnic Communities), Minisita o Tagata Pasefika (Pacific People), ma le Minisita Lagolago o le Soifua Maloloina (Health).
O se taimi muamua lenei ua tulai mai ai se tagata Pasefika e umia ni tofiga Minisita se 4 talu ona faavae mai le Kapeneta o le Malo Niu Sila. O le faamanuiaina o le afioga Peseta i nei tofiga o se faamanuiaga e le gata mo le afioga Peseta, ae o se faaeaea foi mo lona aiga ma soo se Samoa i totonu o Niu Sila nei.
O le faailoga foi lea o le telē ma le maualuga o le faatuatuaina o le afioga Peseta i lalo o le taitaiga a le afioga Toosavili John Key. O lea faatoa 3 nofoaiga a le afioga Peseta ae ua tele lenei faaaloalo ua tuuina atu i ai e Toosavili ona o se tamalii o loo faapea ona iai le tele o tomai ma agavaa auā le faatinoina o tiute i totonu o nei Matagaluega e pei ona faamanuiaina ai.
E le faigofie foi lenei faaaloalo pe a tuu atu i le itu o le afioga Peseta. O le uiga o le tala, o le a tele foi nisi o vaega o le a faapea ona silasila totoa i ai Peseta auā le faatinoina ma le tauaveina o ona tofi ma ona tiute i le lelei e tatau ona iai.
Ua aliali mai ai foi i le filifilia o Peseta i nei tofiga Minisita, e tele lona lumanai o loo faapea ona taoto i totonu o le faigamalo a le National pe afai ae faaauau ai pea ona tulai mai e avea ma Pati e latou te faatautaia le Malo. E le taumate e tele nisi Matagaluega maualuluga e mafai ona siitia atu iai o ia pe afai ae sologa manuia le faatinoina o ona tiute i nei Matagaluega ua pale mai ai.
Talosia ia i le alofa o le Atua ina ia faapea ona ulimasao tiute a le afioga Peseta, ma ia maua lona atamai mai le Alii auā le faataunuuina o ona valaauina. Ia agalelei foi le Alii ma ia maua lona malosi ae sili ai ia maua pea le tofa ma le faautautaga e faatonu folau ai le agai atu i luma ma lona papale mai i nei faamanuiaga e lē eaaavumaua. O le lisi lenei o i latou ua filifilia i le auvaa a Toosavili i lenei tausaga.
