Ua toe lava o se ana ona faamaeaina loa lea o le Konekarate lea ua sainiina ai e le kalapu lakapi a Counties Manukau le alo o Samoa, le kapeteni muamua o le All Blacks o le alii o Tana Umaga. O le vaiaso na tea nei lea na faamaonia mai ai le toe lava o le tuu loa i pepa o lea ioega ma faamautuina ai loa mea uma o lea faamoemoe.
O lea konekarate o le a avea ai le alii o Umaga ma Faiaoga lagolago, ia faapea foi ma tamataalo mo le Kalapu, Player Assistant Coach, mo le lua Taamilosaga o le Ipu o le NPC e aofia ai le tausaga nei ma le tausaga fou. Faaalia e le CEO o le Kalapu o Phill McConnel, o loo faapea foi ona manatu le Kalapu e ave le faamuamua i le faamalosia o le latou laina i luma lea e tele ina faaletonu ma faiaina ai le au i le tausaga talu ai, o nisi o alii iloga foi i le taaloga i Niu Sila nei lea ua i le lisi a le Kalapu latou te sainia mai pe a mae‘a a latou konekarate i fafo e pei o le alii Tonga sa taalo muamua i le Blues o Saimone Taumoepeau ma le sui tuai o le All Blacks ma Canterbury o Greg Somerville, o Somerville ua 32 tausaga o se tasi o Pou autu o lana Kalapu i Gloucester i Peretania, ae na lipofia le toe vave fia foi mai i Niu Sila ona e lē fia nonofo lona aiga i Peretania.
O le ioe o Tana Umaga i lea maliliega o se ai lea ma se fiafiaga tele mo Counties Manukau, ona e le toe tau faailo le agavaa o lea alii o le faagatama o le Lakapi, ae e le taumate le toatele o nisi o alii talavou i le Lakapi i Niu Sila nei o le a fia maua le avanoa e mafai ai ona taaalo faatasi ma Tana, ma faailoa i ai le tele o metotia ma le iloa o lea alii.
O le tele o alii o loo taaalo nei i le laina i tua a le Huuricane a Ueligitone e pei o Maa Nonu, Conrad Smith ma isi, sa tele se sao o Umaga i le tau atinaeina o a latou taaalo. E ui lava ina faitio foi nisi i le kalapu lea ua filifili e Tana e toe foi mai ai i Niu Sila, ae ua faailoa foi le agaga fiafia o le Iuni Lakapi a le atunuu nei i le filifiliga a Umaga.
