30 Rabbitohs vs Bulldogs 6
E muliga foi sauniuniga o le Ipu o le Lalolagi i tusitusiga ma faasalalauga faalauaitele i niusipepa, leitio faapea televise i le taaloga e taualuga ai le taamilosaga NRL i le lakapi League i Ausetalia i le faaiuga o le vaiaso na se‘i mavae atu nei.
E fai o sauniuniga a Au lava foi latou ae o le tulaga o loo vevesi solo ai tapuaiga mai tagata ma faalapotopotoga eseese e faapea foi tupulaga talavou aemaise ai lava paaga a Au nei e lua le Rabbitohs faapea foi le Bullldogs.
Ua pei ua avaga le toatele i le fia silamaimoa i le taaloga o le seneturi, poo le faaupuina faapea o le Hollywood o ata tifaga i se fetauiga matautia e nei kalapu tetele e saili ai le Auro moni i lenei taaloga. Ua avea e pei o se ata tifaga faasolo, auā o loo auina mai ai foi ma se talaaga o nei kalapu iloga i le lakapi o le League.
Ua avea talafaasolopito o nei ‘au e lua ma mafuaaga ua atili vevela ai ma atili siitia ai le tulaga faapolofesa ua oo nei i ai lenei taaloga. Na pei o ni pa maualuluga na matuai solofa ane i lalo ina ua faaeaina le South Sydney Rabbitohs ina ua lagonaina le fa‘ili mulimuli a le laufali ua mae‘a le taaloga ma manumalo ai i le 30 Rabbitohs ia Bulldogs 6.
E silia ma le 43 tausaga o sailiili atu pea le Rabbitohs i sona avanoa e umia ai le Siamupini aoao, mai lava i le tausaga 1971 na uluai siamupini ai a o lea ua silia ma le 43 tausaga faatoa toe pale mai i lea Ipu autu o lenei taamilosaga. O se fuainumera maualuga na oo i ai tagata maimoa na faatumulia ai le malae i le taaloga, e silia ma le 83,833 na lolofi i le malae ma molimaiina lea taaloga mataina. E maitau atu i faagasologa o le taaloga na matuā maopoopo lelei osofaiga a le Rabbitohs i le ‘afa muamua o le taaloga.
E ui lava foi i le taumafai mai a le Bulldogs ia, ae lei toe solomuli ese mai ai le Rabbitohs i ana osofaiga mai lava i le amataga ma le ‘afa muamua o le taaloga; na atili feai ai lava le Rabbitohs ina ua siisii mai aao o le alii ia Kirisome Auvaa, na faapea foi ona lē gagana le pulega a le Rabbitohs ina ua mae‘a le taaloga, aemaise ai lava pe a toe mafaufau ma toe faafoi i le 43 tausaga talu ai.
Ae o se moemitiga ua silia ma le 2 tausaga o sauniuni agai i ai, a o lea ua pale ai ma le manuia, o se tasi o vaega na vaaia i lea aoauli o le vevela ma le mafanafana o le tau ua ausia le 34 degree i le vevela o lea afiafi, na matuai suipi lelei alo ma tama fanau a Samoa sa filifilia mo lea taataloga e pei o le alii ia Ben Te‘o, Kirisome Auvaa faapea foi ma nisi.
Leiloa poo afea e motusia ai le fiafia tele o nei tamalii e lē gata ua faaeaina, aemaise ai le lava le onosaia o le isi 43 tausaga. Faamata ana o oe e te lavatia le toe saili avanoa poo le nofonofo ai pea mo le 43 tausaga? Ae o se vaaiga lenei i le Au na filifilia mo lea taaloga mataina ua tuanai atu i le faaiuga o le vaiaso.
Rabbitohs: 1. Inglis, 2. Johnston, 3. Walker, 4. Auva’a, 5. Tuqiri, 6. Keary, 7. Reynolds, 8. G. Burgess, 21. Koroisau 10. Tyrrell, 11. Te’o, 12. Sutton, 13. S.Burgess.
Interchange: 14. Clark, 15. Turner, 16. McQueen, 17. T.Burgess
Coach: Michael Maguire
Bulldogs: 1. Perret, 2. Thompson, 3. Morris, 4. Lafai, 5. Brown, 6. Reynolds, 7. Hodkinson, 8. Tolman, 19. Mbye 10. Graham, 11. Jackson, 12. Williams, 13. Eastwood.
Interchange: 14. Browne, 15. Finucane, 16. Klemmer, 17. Pritchard
Coach: Des Hasler
