O se lekoki poo se matatia a o se talafaasolopito foi i totonu o Niu Sila le sailiga seleni a le Ekalesia Faapotopotoga a le Atua mai Fusi Safata, lea sa faataunuuina i le hall a le Intermediate School i Magele i le aoauli o le Aso Toonai ua mavae 19 o Setema, e na o le 2 itula sa faatautaia ai lea faamoemoe ae latou taulimaina se seleni $26,015. 30.
O se tupe tele lea foai ma le limalima alofa o le atunuu aemaise o tamafanau o lea afioaga o loo alaala ma papaaao i totonu o lenei atunuu, pe a faatusatusa i le umi sa saili seleni ai.
O le toatele o nisi o aiga ma uo, e taunuu atu ua uma le faamoemoe ma ua mae‘a foi ona faailoa le aofaiga o le faoai, ae sa lē tuua ai le silasila i le Atua ma lana galuega faapea le manatu i aiga o loo tu‘i le mulipapaga mai afioaga, sa tauaao ma tusitusia pea i lalo lo latou maau ma le milomilosia, ma e ono maua ai se seleni e latalata i le $30,000.00.
O le faamoemoe o lenei Ekalesia mai Samoa o le faamae‘aina o le maota o le galuega, ma sa malaga mai lava le susuga i le faafeagaiga ia Taei Tietie faapea le aumalaga e to‘a 10, faatasi ai ma le afioga ia Tuia Paepae o ia o lo nafa ma le vaaiga o le atinae o le ekalesia.
O susuga i faafeagaiga ma o latou faletua, o aiga ma uo faapea tamafanau a le afioaga ma le Ekalesia sa tumutumu ai i lenei hall e tuu atu lo latou tau‘au e fesoasoani ai i le maota o le galuega.
E eseese a faiga ae tumau lava le faavae, auā sa ese foi le faagasoloina o le polokalame o lea aso, e pei ona uli ai e le susuga i le faafeagaiga ia Solomona Leota le sa o lea aso (MC) ma o ia foi o le taitaifono o lea mafutaga.
O pese faaleagaga sa peseina e le team na malaga mai Samoa, sa sisiva fiafia ai tagata ma lafo lo latou foai, e ese foi lagona ma le loto olioli e foai sa maitauina i lea aso i tagata.
Na amata le polokalame i le 2 i le aoauli ae mae‘a ua ta le 4 i le afiafi. Short and Sweet. Sa faaiu i le saunoaga faafetai a le susuga i le faafeagaiga mai Samoa ia Taei Tietie i le mamalu o le atunuu aemaise o tamafanau a le afioaga e tusa ai ma le talisapaia o le savali, ma alo ai loa i le taumafataga.
Na taoto foi le aganuu a Samoa i tulaga e masani ai aso faapenei i faaaloaloga ma le faatau a le faleupolu auā ua uma ona saunoa le fofoga o le aso i le polokalame a o lei amataina le faamoemoe.
O le mafutaga i Niu Sila o lo taitai ai le susuga i le faafeagaiga ia Solomona Leota ae failautusi ai le faafeagaiga ia Tausaga Ionatana, faatasi ai ma aiga e to‘a 15 o loo auai. Na faavaeina lenei mafutaga ia Aukuso ina ua sau le aveai mai Samoa i le tausi matagaluega ma le Ekalesia mo se fesoasoani, ma e tasi le masina sa tuufaatasi ma faamaopoopo ai loa le mafutaga auā se fesoasoani mo le galuega i Fusi Safata.
O le Aso Gafua na toe alo atu ai le sa o le faigamalaga i Ausetalia auā le faaauauina o le sailiga seleni.
