“Ou te faamalulu i o‘u aiga ma uo faapea le atunuu ona e tala seseina o‘u aafiaga”…Lautapaa
Na loka e leoleo i Amerika Samoa ona o tuua‘iga e faasino i se tamaitai le alii fusu o Aukuso Faamanu, ae loka atu ai ma le susuga Lautapaa Ofe, o se tasi o faiaoga o le aufusu a Tumua ma Pule, na masii i Tutuila ona o tausinioga o le vaiaso o le Mosooi. Ua toe malaga i Apia Lautapaa ina ua mae‘a ona suesue lona moliaga o le faaoolima sa mafua mai ona o le tamaitai Tutuila o loo tuua‘ia ai le alii fusu o Faamanu e faapea na momoe ma le tamaitai.
I se feiloaiga ma Lautapaa i le Aso Toonai na tea nei na toe taunuu ai i Samoa, na ia faailoa ai le sese o le moliaga muamua na faia e leoleo i Tutuila ia te ia, lea na tuua‘ia ai i lona tagofia o le tamaitai, o loo mafua ai ona molia le alii fusu o Aukuso Faamanu. Fai mai Lautapaa na ia maua atu le alii fusu o loo momoe faatasi i luga o le moega o le fale sa api ai.
“Ou te lē iloa se teine auā sa pulolou, ae na ou tago atu tase‘i mai fala sa momoe ai i luga. O‘u tago atu toso ese, na ou iloa ai o le teine, ae e leai sa‘u gaioiga na faia i le teineititi”. O le faamatalaina lea e le faiaoga o le maea fusu a Tumua o le mea na tupu.
O le aso na sosoo ma le mea na tupu, na tapena ai le aufusu a Tumua ma Pule e toe foi i Samoa i le malaga a le Lady Naomi, ma o le aso lava lea na tutū atu ai ma leoleo ma fesiligia poo fea Lautapaa. “Sa ou savali atu i ai auā ou te iloa e leai sa‘u mea ua faia, ae te‘i i le fai mai o le a ave a‘u e loka”. Sa faateia le alii faiaoga i le faamatalaga a leoleo ae sa ia usitaia pea ma taumafai e faamatala lana mau i le mea tonu na tupu.
Peitai o le faamatalaga a Lautapaa e lei faatalanoaina foi o ia pe fai sana faamatalaga, ae sa ave sa‘o loa i le nofoaga i Tafuna ma loka ai. O le nofoaga lea na faato‘ā faailoa atu ai e leoleo o le falepuipui le moliaga ua faia e leoleo. “Sa matuā oo ifo lo‘u ita tele ona e matuā sese lava le moliaga”.
O le Aso Gafua, aso 7 Novema 2011 na tulai ai Lautapaa i le faamasinoga, peitai sa lē maua ai sona avanoa e fai sana faamatalaga i le mea tonu na tupu. Na faato‘ā faia lana faamatalaga ina ua toe tulai i le Aso Lua, aso 8 Novema 2011, lea na faailoa ane ai e leoleo ua suia lona moliaga i le faaoolima māmā, ona sa tago lona lima i le tau‘au o le teineitiiti ma toso ese a o pulou i le ieafu i luga o le moega sa teu ai fala moe. Sa momoe ai lea teineitiiti ma le alii fusu o Faamanu, i totonu o le potu ma le tama fusu.
“Sa ou fai i ai ou te tetee ona e lē faapea o se faaoolima ae na ou tago aveese mai ae se‘i aveese fala”. Peitai sa fautuaina o ia e le loia a le Malo e sili ona ioe, auā a tetee o le a umi se taimi e nofo ai i Tutuila e faatali lona faamasinoga.
“O le mafuaaga lena na ou ioe ai, ma aumai loa le faasalaga e $100 tala ma le lua tausaga ou te nofo vaavaaia ai, ma o le lua tausaga foi lena e lē mafai ai ona ou toe ulufale i Tutuila”.
O le isi mafuaaga o lona ioe vave ona e tele ana pisinisi ma galuega ua poloka uma talu ona taofia ai i Amerika Samoa ona o lenei mataupu. O le alii fusu o Faamanu o loo taofia pea e leoleo i Tutuila ma o le faamatalaga a Lautapaa, ua ioe le alii fusu i ona moliaga o le faiaiga ma se teineititi e laititi tausaga ma e lē o faatagaina e le tulafono.
O le vaiaso nei i le Aso Tofi, aso 17 Novema 2011 o le a lauina ai se faaiuga mo Aukuso Faamanu, o se tamafusu o le maea a Puleono mai le afioaga o Fa‘ala Palauli.
